काठमाडौं । चेल्सीको इंग्लिस प्रिमियर लिगमा शीर्ष चारको दौडमा गम्भीर धक्का पुगेको छ ।
प्रिमियर लिगअन्तर्गत आइतबारराति भएको खेलमा तुलनात्मक रुपमा कमजोर एभर्टनसँग २–० ले पराजित भएपछि चेल्सीको शीर्ष चारको यात्रामा धक्का लागेको हो ।
आफ्नै मैदानमा एभर्टनलाई विजयी गराउन रिचार्लिसन र सिगुर्डसनले एक एक गोल गरे । हारपछि चेल्सीले अंकतालिकाको चौथो स्थानमा उक्लिने अवसर गुम्यो ।
लिगमा ३१ खेलबाट ७६ अंक जोडेको लिभरपुल शीर्ष स्थानमा छ । एक खेल कम खेलेको म्यानचेस्टर सिटी ७४ अंकसहित दोस्रो स्थानमा छ । तेस्रो स्थानको टोटनह्याम हट्सपरको ६१ अंक छ ।
६० अंकसहित आर्सनल चौथो स्थानमा रहँदा ५८ अंक जोडेको म्यानचेस्टर युनाइटेड पाँचौं तथा ५७ अंकसहित चेल्सी छैटौं स्थानमा छ ।
आइतबारराति नै भएको अर्को खेलमा फुल्हमलाई हराउँदै लिभरपुल लिगको शीर्ष स्थानमा उक्लिएको छ । फुल्हमको मैदानमा भएको खेलमा लिभरपुल २–१ ले विजयी भयो ।
प्रकाशित मिति: सोमबार, चैत ४, २०७५ १०:५०
