काठमाडौं : विप्लव नेतृत्वको नेकपा निकट जनपत्रकार संगठन,नेपाल कालिकोटका संयोजक कर्ण बिकलाई रिहा गर्न सरोकारवालाले माग गरेका छन् । रेडियो नयाँ कर्णालीमा कार्यरत पत्रकार बिकलाई बुधबार कार्यालयबाटै प्रहरीले पक्राउ गरेको हो ।
पत्रकार महासंघका महासचिव रमेश विष्टले विज्ञप्ति जारी गर्दै बिकलाई रिहा गर्न माग गरेका छन् । ‘कुनै पनि बहानामा पत्रकारलाई स्टुडियोमै पक्राउ गरिनु प्रेस तथा अभिव्यक्ति स्वतन्त्रतामाथिको हस्तक्षेप हुनुका साथै संविधानविपरीतको कार्य हो । महासंघ पत्रकारको संवैधानिक स्वतन्त्रतामाथि भएको यो हस्तक्षेपको भत्र्सना गर्दछ ,’ विज्ञप्तिमा भनिएको छ, ‘ पक्राउ परेका पत्रकारको तत्काल रिहाई गरी प्रेस स्वतन्त्रताको सम्मान गर्न सम्बन्धित निकायसँग माग गर्दछ । ’
त्यस्तै, जनपत्रकार संघ नेपालले पनि उनको रिहाईको माग गर्दै गिरफ्तारीलाई प्रेस स्वतन्त्रताविरोधी कार्य भनेको छ । संगठनका अध्यक्ष प्रकाश डुम्रे र महासचिव हिम विष्टले विज्ञप्ति जारी गर्दै प्रेस स्वतन्त्रताको सम्मान गर्न सरकारलाई आग्रह गरेका छन् ।
रेडियो नयाँ कर्णालीले पनि आफ्ना पत्रकार बिकलाई कार्यालयबाटै प्रहरीले पक्राउ गरेको भन्दै विरोधमा रेडियो प्रशारण बन्द गर्ने निर्णय गरेको छ ।
प्रकाशित मिति: बिहीबार, चैत ७, २०७५ २२:०१