काठमाडौं : खानेपानी तथा सरसफाई मन्त्री बिना मगरले उपत्यकामा खानेपानीको समस्या चाँडो हल गर्न आफू योजनाबद्ध ढङ्गले लागिरहेको बताएकी छिन् ।
काठमाडौँ उपत्यका खानेपानी व्यवस्थापन बोर्डको १४औँ वार्षिकोत्सव समारोहमा उनले उपत्यकामा खानेपानीको आपूर्ति व्यवस्था सहज बनाउन गम्भीर भएर लागेको बताइन् । काठमाडौँमा मेलम्चीको पानी ल्याउने मात्रै ठूलो कुरा नभएर यसको व्यवस्थापन पनि महत्वपूर्ण भएको मन्त्री मगरले औँल्याइनन् । उनका अनुसार खानेपानीको वितरण र व्यवस्थापन सबैभन्दा ठूलो चुनौतीका रुपमा रहेको छ ।
मन्त्रालय मातहतका कार्यालय खानेपानी आपूर्तिसँगै व्यवस्थापनमा लागेको उनले बताइन् । उनले भनिन्, खानेपानी बोर्ड, केयुकेएल र आयोजना कार्यान्वयन निर्देशनालय लगायतका निकाय यो काममा लागिरहेका छन् । जनताको अपेक्षा र आवश्यकताअनुसार खानेपानीको पहुँच विस्तार गर्न मन्त्रालय लागिपरेको उनले जानकारी दिइन् ।
खानेपानी मन्त्रालयका सचिव दीपेन्द्रनाथ शर्माले सन् २०३० सम्ममा प्रशोधनसहित ९० प्रतिशत जनताका घरमा पानी पुर्याउने मन्त्रालयको लक्ष्य रहेको बताए । उनले भने, दिगो लक्ष्य प्राप्तिका लागि पनि जनताका घरघरमा पानी पुर्याउने योजना बनिरहेको छ ।
बोर्डका अध्यक्षसमेत रहेका मन्त्रालयका सहसचिव तेजराज भट्टले काठमाडौँ उपत्यकामा खानेपानी तथा ढल व्यवस्थापनका लागि गुरुयोजना बनिरहेको जानकारी दिए ।
