काठमाडौं:प्रधानमन्त्री केपी शर्मा ओलीले त्रिशुली ३ बी जलविद्युत आयोजनाको साधारण शेयर (आइपिओ) को १० हजार कित्ता शेयर खरिदका लागि आवेदन दिएका छन् ।
आज प्रधानमन्त्री निवास बालुवाटारमा आयोजित एक कार्यक्रममा नेपालको पानी जनताको लगानी कार्यक्रमको उद्धघाटन गर्दै प्रधानमन्त्री ओलीले शेयर खरिद गरेका हुन्।यसैगरी प्रधानमन्त्री पत्नी राधिका शाक्यले पनि १० हजार कित्ताको आवेदन दिएकी छन् । उर्जामन्त्री बर्षमान पुन ‘अनन्त’ ले एक हजार कित्ता र पूर्व सभामुख ओनसरी घर्ती मगरले दुई हजार कित्ताको आवेदन दिए ।
शेयर खरिद गरेपछि प्रधानमन्त्री ओलीले आज नयाँ अभ्यासको थालनी भएको बताए । प्रधानमन्त्री ओलीले आम सर्वसारधणलाई यस प्रकारका आयोजनामा लगानी गर्न प्रोत्साहित गर्न आफूले पहिलो शेयर खरिदका लागि आवेदन दिएको बताए ।
प्रधानमन्त्री ओलीले मौरीले थोरै थोरै फूलको रस संकलन गरेर धेरै मह जम्मा गरेजस्तै नेपालीको थोरै थोरै लगानीले ठूला आयोजनाहरु निर्माण गर्न सकिने बताए ।
मौरीले फूलको थोरै रस संलकन गरेर मह जम्मा गरे जस्तै हामीले थोरै थोरै लगानीमा सबै जनतालाई सहभागिता गराएर ठुला आयोजनाको निर्माण गर्न सक्छौं प्रधानमन्त्री ओलीले भने यस्तो अभियान पर्यटन,कृषि आदिका क्षेत्रमा पनि सञ्चालन गर्न सकिन्छ ।
वहालवाला तथा सेवा निवृत भइसकेका पूर्व शिक्षक,कर्मचारी तथा सुरक्षाकर्मीहरुले पनि यस्ता आयोजनाहरु सञ्चालन गर्न सक्ने प्रधानमन्त्री ओलीको भनाइ छ ।
यो कार्य आफ्नो देश आफैं बनाउँ अभियानको सुरुवात हो प्रधानमन्त्री ओलीले भने यसमा सहभागी हुनका लागि विदेशमा रहेका सम्पूर्ण नेपालीहरुलाई म आह्वान गर्दछु । यस्तो अभियानले देशलाई छिटो समृद्धिमा पु¥याउन सकिन्छ ।
प्रकाशित मिति: बिहीबार, चैत ७, २०७५ १६:२०