काठमाडौं : प्रधानमन्त्री केपी शर्मा ओलीले नयाँ वर्ष २०७६ को अवसरमा राष्ट्रका नाममा सम्बोधन गरेका छन् । सम्बाेधनका क्रममा उनले देश विकासका लागि आफू १८ घण्टा खटिरहेकाे बताए ।
प्रधानमन्त्री निवास बालुवाटारबाट गरेकाे सम्बोधनमा प्रधानमन्त्रीले २०७५ कानुन निर्माण र समृद्धिको जग बसाल्ने वर्ष भएको बताए । सरकारलाई गर्ने प्रश्नको शैली बदल्न आग्रह गर्दै उनले सरकारले यो वर्ष केही काम गरेन, किन? भन्ने प्रश्न गर्नुभन्दा पनि यो वर्ष सरकारले के के काम गर्यो? तुइन बिस्थापन गरेर कति फाइदा भयो? भनेर प्रश्न गर्न आग्रह गरे ।
ओलीले घरजग्गा कारोबार, नक्कली भ्याट बिल प्रकरण, संगठित तस्करीलगायतका अनुचित कामको छानबिन भइरहेको जानकारी दिए । उनले जालझेल गरी कब्जा गरिएका सरकारी जग्गा धमाधम फिर्ता गर्न लागिएको पनि बताए ।
प्रधानमन्त्री ओलीले भने, ‘घरजग्गा कारोवार होस् वा संगठित तस्करी,भन्सार/अध्यागमनको विषय होस् वा हुण्डी कारोबार तथा विदेशी विनिमय अपचलन, नक्कली भ्याट बिल प्रकरणदेखि सबै प्रकृतिका अवाञ्छित/अनुचित कामको छानबिन जारी छ । जालझेल गरेर कब्जा गरिएका सरकारी जग्गाहरू धमाधम फिर्ता गरिँदै छन्, गरिँदै जाने छन् । राज्यको सम्पत्तिमाथि अनधिकृत दोहनलाई सरकारले छुट दिने छैन ।’
प्रधानमन्त्रीले २० मिनेटको सम्बोधनका लागि करिब दुई हजार शब्दको लिखित मस्यौदा तयार गरेका हुन् । हेराैं सम्बाेधनकाे पूर्ण पाठ :
प्रकाशित मिति: आइतबार, वैशाख १, २०७६ १२:२९
