विराटनगर : मोरङको कटहरी गाँउपालिकास्थित जमटोकीमा प्रदेश १ स्तरीय फलफूल तथा तरकारी थोक बजारको शुभारम्भ भएको छ । आइतबार प्रधानमन्त्री केपी शर्मा ओलीले सो बजारको उद्घाटन गर्दैै बजारको साँचो प्रदेश १ का मुख्यमन्त्री शेरधन राईलाई हस्तान्तरण गरे ।
विराटनगर महानगरसँग जोडिएको कटहरीमा छ महिनाअघि नै सो बजारको निर्माण कार्य सम्पन्न भएको थियो । तर प्रधानमन्त्रीबाटै बजारको उद्घाटन गराउने सोचका कारण आइतबार मात्र बजारको शुभारम्भ भएको हो । प्रदेश सरकार मातहत आएपछि बजारलाई कार्यविधि र निर्देशिका बनाएर व्यवस्थित तवरले सञ्चालन गर्ने लक्ष्य लिइएको छ ।
विश्व बैङ्कको सहयोगमा १५ करोड ४९ लाख रुपैयाँको लागतमा निर्माण गरिएको सो बजारका लागि ५० वर्षसम्मका लागि जनप्रिय माविको चार विगाह दुई कठ्ठा र कटहरी गाँउपालिकाको १८ कठ्ठा जमिन भाडामा लिइएको हो ।
प्रधानमन्त्री ओलीले सरकारले निर्माण गरेको संरचनामा कृषकहरूले उत्पादन गरेको सामग्री बिक्री गर्न सहज हुने विश्वास ब्यक्त गरे । उनले सरकार कृषक भएकै स्थानमा पुग्ने उद्घोष पनि गरे ।
होलसेल र खुद्रा कृषिजन्य सामग्री खरिद बिक्री गर्न सकिने सो बजारमा ३८ वटा थोक बिक्री कक्ष, एउटा बिक्री सेड, चमेना गृह, कृषक अतिथि गृह, बैङ्क शाखा, सार्वजनिक शौचालयलगायतको व्यवस्था रहेको छ । बजारमा एक हजार ४८८ वर्ग मिटरमा १७ वटा होलसेल पसलको व्यवस्था रहेको छ । बजारमा वार्षिक ४४ हजार ९६६ मेट्रिक टन तरकारी र १० हजार मेट्रिक टन फलफूल बिक्री वितरण हुने कृषि तथा पशुपंक्षी विकास मन्त्रालयले अपेक्षा गरेको छ ।
प्रकाशित मिति: आइतबार, चैत ३, २०७५
-1732776560.jpg)
