लिवियामा चादेली विद्रोही समूहका चार सय लडाकूले आत्मसमर्पण गरी आफ्ना हतियार सरकारलाई बुझाएका सोमबार चादका रक्षामन्त्री जनरल दाउद याया ब्राहिमले बताए।
सन् १९९० मा विद्रोह गरी राष्ट्रपति बनेका इद्रिस देबाइले विद्रोहीले सरकारसमक्ष आत्मसमर्पण गरेमा उनीहरूलाई आम माफी दिनसकिने गत वर्षको मे महिनामा गरेको घोषणालाई मान्दै उनीहरू कानुनी दायरामा आएको मन्त्री ब्राहिमले प्रष्ट पारे।
इुनियन अफ फोर्सेस फर डिमोक्रेसी एण्ड डेभलपमेन्ट (युएफडिडी) आवद्ध विद्रोहीले राष्ट्र प्रमुख र सरकारको आह्वान अनुसार चादको मुलधारको राजनीतिमा आउने इच्छा प्रकट गर्दै आफ्ना हतियार सरकारलाई बुझाएका हुन्।
उनले भने, विद्रोही लडाकूको उक्त समूह तीन दिन पहिले चादको उत्तरी क्षेत्रमा पुगी आत्मसमर्पण गरेका थिए।
राष्ट्रपतिले हत्या हिंसा त्यागेर मुलधार अर्थात खुला राजनीतिमा आउने विद्रोहीलाई स-सम्मान राज्यले स्वागत गर्ने बताएका थिए।
यसैबीच उक्त समूहका प्रवक्ता महमत असिलेक हालताले भने, विद्रोहीद्वारा सरकारसँग आत्मसमर्पण गरिएको भन्ने कुरा आधारहीन हाे। आत्मसमर्पण गरिएका भनिएका सबैजना आफ्नो समूह युएफडिडीका सदस्य नभइ सुन खानीमा काम गर्ने श्रमिक भएको असिलेकले दाबी गरे।
युएफडिडीका नेता महमत नुरीले भने, लिवियामा रहेका झण्डै एक हजार लडाकूमध्ये फेब्रुअरीको सुरूदेखि अहिलेसम्म मात्रै ८६ लडाकू चाद फर्केका हुन्। सरकारले ४ सय लडाकूले आत्मसमर्पण गरेको भन्ने सबै सुन खानीमा काम गर्ने कामदार हुन्।
चादको तिवेस्ती सीमा क्षेत्रमा सुन खानी भेटिएपछि केही क्षेत्रमा सन् २०१२ पछि हिंसा फैलिएको थियो।
प्रकाशित मिति: मंगलबार, फागुन २८, २०७५
-1732776560.jpg)
