काठमाडाैं : काठमाडाैंकाे धुम्बाराहीमा सगरमाथा गर्ल्स फुटसल २०७५ हुने भएको छ । प्रतियोगिता आयोजक सगरमाथा एजुकेसनल एकेडेमीले आज पत्रकार सम्मलेन गर्दै फागुन ३० गतेदेखि चैत २ गतेसम्म गर्ल्स फुटसल सञ्चालन गर्न लागिएको जानकारी दिएको हो ।
धुम्बाराहीमा रहेको धनवन्तरी फुटसलमा हुने प्रतियोगितामा २० विद्यालयहरुले सहभागिता जनाउने छन् । कार्यक्रममा सगरमाथा एकेडेमीका प्रिन्सिपल पुष्पराज सिंखडाले भने,‘नेपालमा महिला खेलाडीहरुको संख्या कम देखिन्छ । महिलाहरुको संख्या कम हुनुको एउटा कारण अवसर नपाउनु पनि हो । त्यसैले यस्ता कार्यक्रमहरु आयोजना गरेर विद्यालय तहदेखि नै अवसर प्रदान गर्न लागेका हौँ ।’
उनले महिला फुटसलमा केही योगदान पुर्याउन पनि कार्यक्रम आयोजना गरिएको बताए । प्रतियोगितामा प्रथम, द्वितीय र तृतीय हुने टोलीलाई क्रमश १५ हजार, आठ हजार र पाँच हजार नगद पुरस्कारको व्यवस्था गरिएको आयोजकले जनाएको छ ।
प्रतियोगितामा बेष्ट स्कोर, बेष्ट प्ले, बेष्ट कोचले ट्रफी तथा प्रमाणपत्र प्राप्त गर्ने छन् ।
प्रकाशित मिति: आइतबार, फागुन २६, २०७५
