विज्ञप्तिका नाममा जिल्ला सभापतिको नाम दुरुपयोग भयाे : डा.महत

राजनीति

काठमाडौं : नेपाली कांग्रेसका सहमहामन्त्री डा.प्रकाशशरण महतले जिल्ला सभापतिको नाम दुरुपयोग गर्दै सामाजिक सञ्जालमा अफवाह फैलाइनु गलत भएको बताएका छन् । मंगलबार दिउँसो ५६ जिल्ला सभापतिको तर्फबाट भन्दै विज्ञप्ति जारी भएको थियो ।

सो बारे आजको न्युजसँग कुरा गर्दै सहमहामन्त्री महतले विज्ञप्तिमा आफ्नो नाम दुरुपयोग भएको भन्दै जिल्ला सभापतिहरुले आफुलाई टेलिफोन गरेरै जानकारी गराइसकेको बताए । ‘जिल्ला सभापति साथीहरुले फोन गरेरै आफुहरुले कुनै विज्ञप्ति जारी नगरेको बताइरहनुभएको छ,’ सहमहामन्त्री महतले भने, ‘ नुवाकोटमा सम्पन्न जिल्ला सभापति भेलामा भएको नाम दुरुपयोग भएको गुनासो आएको छ । जिल्ला सभापतिहरुले औपचारिक रुपमा कुनै विज्ञप्ति जारी गरेको थाहा छैन ।’ उनले संगठनभित्र अराजकता मच्चाउन केही व्यक्ति नियोजित रुपमा लागिरहेको पनि बताए । विशेष महाधिवेशन माग गरिरहेको प्रश्नमा महतले भने, ‘ के का लागि विशेष महाधिवेशन ? केही व्यक्तिले जथाभावी गर्न खोज्दैमा विशेष महाधिवेशन हुन्छ ?’

मंगलबार दिउँसो ५६ जिल्ला सभापतिका तर्फबाट भन्दै जारी विज्ञप्तिमा महासमिति बैठकको निर्णय उल्टाइएको आरोप लगाइएको थियो ।

विज्ञप्तिमा के थियो ?
नेपाली कांग्रेसको २०७५ पुुस २९ गतेदेखि माघ ९ गते सम्म काठमाडौँमा सम्पन्न महासमिति बैठकमा पार्टी सभापति श्री शेरबहादुर देउवा र वरिष्ठ नेता श्री रामचन्द्र पौडेलले अधिकांश महासमिति सदस्यहरूको प्रस्तावअनुसार विधानमा उल्लेखित स्वतः प्रतिनिधिसम्बन्धी प्रावधान हटाउन र समानुपातिक तथा आरक्षण कोटाबाट एकै व्यक्तिलाई दोहोर्‍याएर अवसर नदिनेसम्बन्धी व्यवस्था थप गर्नेसम्बन्धमा ऐक्यवध्दता जनाउनुभएको थियो । यसरी महासमिति बैठकबाट पास भइसकेको विषयलाई केन्द्रीय कार्यसमितिको पछिल्लो बैठकले उल्टाएको खबरले हामीलाई आश्चर्यचकित तुल्याएको छ । महासमितिभन्दा ठूलो केन्द्रीय कार्यसमिति हुन सक्दैन भन्ने कुरालाई पूर्णतः उपेक्षा गरी पार्टी सभापति जस्तो गरिमामय पदको विश्वसनीयतासमेत समाप्त गर्ने काममा केही नेताहरू देखापर्नु दुर्भाग्यपूर्ण हो ।

उक्त दुई विषयलाई लिएर पार्टी केन्द्रीय कार्यालयको सचिवालयमा औपचारिक रूपमै दर्ता भएको (द· न· ९३) महासमिति सदस्यहरूको हस्ताक्षरलाई बेवास्ता गरी संशोधन प्रस्ताव नै नआएको जस्ता गलत प्रचारबाजीमा उत्रनु अझै हास्यास्पद छ ।

महासमिति बैठक र यसको निर्णयबाट उत्साहित भएका आम पार्टी सदस्यहरूलाई केन्द्रीीय समितिको पछिल्लो निर्णयले निराश बनाएको छ । पार्टी संगठन र पार्टी नेतृत्वको विश्वसनीयतालाई गम्भीर क्षति पुर्‍याउने उक्त निर्णयमाथि शीघ्र पुनर्विचार गर्न जोडदार माग गर्दछौंँ । अन्यथा विशेष महाधिवेशनका लागिसमेत पहल गर्न बाध्य हुनेछौंँ ।

जय नेपाल ।

कोको सभापतिको नाम छ विज्ञप्तिमा ?

प्रदेश नम्बर १

१. लीलादेवी बोखिम — ताप्लेजुङ

२. नरेन्द्रकुमार केरुङ्ग — पांँचथर

३. हिमालय कर्माचार्य — इलाम

४. उद्धव थापा — झापा

५. गोविन्द ढुंगाना — तेह्रथुम

६. नन्दमणि राई — भोजपुर

७. नरेशकुमार श्रेष्ठ — खोटाङ

८. विनोद बस्नेत — सोलुखुम्बु

९. राजिव कोइराला — सुनसरी