काठमाडौं ः भूकम्पको जोखिममा रहेका नेपालका २० स्थानमा ‘भूकम्प मापन स्टेसन’ निर्माण हुने भएको छ ।
सरकारले भूकम्पको जोखिमलाई दृष्टिगत गरी विभिन्न देशको सहयोगमा २० स्थानमा ‘भूकम्प मापन स्टेसन’ निर्माण गर्न लागेको हो । जसमध्ये चीन सरकारको सहयोगमा १०, जापान सरकारको सहयोगमा ८ र राइम्सको सहयोगमा २ स्थानमा ‘भूकम्प मापन स्टेसन’ निर्माण हुन लागेको हो ।
चीन सरकारको सहयोगमा सङ्खुवासभा, सोलुखुम्बु, रसुवा, लमजुङ, मुस्ताङ, डोल्पा, मुगु, बाजुरा, दार्चुलालगायत जिल्लामा ‘भूकम्प मापन स्टेसन’ निर्माण हुन लागेको छ । त्यस्तै, जापान सरकारको सहयोगमा सिन्धुली, बारा, चितवन, नवलपरासी, स्याङ्जा, म्याग्दी, कपिलवस्तु, रोल्पा तथा रायम्सको सहयोगमा महोत्तरी र दाङमा स्टेसन निर्माण हुन लागेको छ । २०३७ सालमा फूलचोकी डाँडामा पहिलो भूकम्प मापन स्टेसन स्थापना भएको थियो ।
राष्ट्रिय भूकम्प मापन केन्द्रका प्रमुख लोकविजय अधिकारीले स्टेसन निर्माण भएपछि नेपालभरका भूकम्पको डाटा मापन गर्न सहज हुने बताए । ‘धेरै स्टेसन निर्माण भएसँगै सानाभन्दा साना भूकम्पको समेत मापन गर्न सहज हुन्छ,’ उनले भने । २०७२ साल वैशाख १२ गतेको भूकम्पपछि नेपालमा ४ रेक्टर स्केलभन्दा माथिका ५०० भन्दा बढी र ४ रेक्टर स्केलभन्दा साना ५० हजारभन्दा धेरै भूकम्प गइसकेको केन्द्रले जनाएको छ ।
हाल राष्ट्रिय भूकम्प मापन केन्द्र लैनचौर र राष्ट्रिय भूकम्प मापन केन्द्र सुर्खेतबाट देशरभरको भूकम्पबारे जानकारी लिँदै आइएको छ ।
प्रकाशित मिति: आइतबार, फागुन १९, २०७५
