आगामी महिना काठमाडौंमा आयोजना हुने लगानी सम्मेलनमा चिनियाँ लगानीकर्तालाई सहभागी हुन आह्वान गर्दै चीनस्थित नेपाली दूतावासले बेइजिङमा सोमबार लगानी सम्मेलन आयोजना गरेको छ ।
झण्डै १२० बढी लगानीकर्ता, व्यावसायिक प्रतिष्ठान, प्राज्ञिक समुदाय तथा अन्यको उपस्थिति रहेको उक्त कार्यक्रममा लगानी बोर्डका प्रमुख कार्यकारी अधिकृत महाप्रसाद अधिकारी, चीनका लागि नेपाली राजदूत लीलामणि पौड्याल, नेपाली दूतावासका मिनिस्टर सुशीलकुमार लम्साललगायतले चिनियाँ लगानीकर्ता एवं व्यवसायीलाई नेपालमा लगानी गर्न आग्रह गर्दै लगानीको सुरक्षा र लगानीकर्तालाई सहजीकरण गर्न नेपाल सरकार सबै प्रकारले तत्पर रहेको बताएका छन् ।
सो अवसरमा लगानी बोर्डका प्रमुख कार्यकारी अधिकृत अधिकारीले नेपालमा अहिले स्थिर र बलियो सरकार रहेको भन्दै लगानीकर्ताका लागि नेपालमा लगानी गर्ने उत्तम समय भएको धारणा राखे ।
लगानीको सुरक्षा, लगानीमैत्री कानुनको व्यवस्था तथा प्रतिफल लैजान पाउने जस्ता विषयमा सरकारले स्पष्ट व्यवस्था गरेको छ । लगानीकर्ताले नेपालमा व्यवसाय गर्दा अब कुनै असहज वातावरण भोग्नुपर्दैन , चिनियाँ लगानीकर्तालाई ढुक्क भएर लगानी गर्न आह्वान गर्दै अधिकारीले भने ।
अधिकारीले चिनियाँ लगानीकर्तालाई नेपाल सरकारले कम्पनी ऐन, विशेष आर्थिक क्षेत्र तथा अन्य केही कानुनहरू संशोधन गरिसकेको तथा अन्य केही कानुनहरू संशोधन गर्ने चरणमा भएको बताउँदै सबै कानुनहरू लगानी प्रवर्द्धनम सहयोगी रहनेमा आश्वस्त तुल्याए ।
कृषि, बैंकिङ, शिक्षा, स्वास्थ्य, पर्यटन तथा खनिजलगायतका क्षेत्रमा लगानीको प्रतिफल उच्च रहेको बताउँदै अधिकारीले लगानीकर्तालाई उनीहर"को लगानी सुरक्षा र व्यवसायमा सहजीकरण गर्न सबै प्रकारको सहयोगको प्रतिबद्धता जनाउनुभएको छ ।
तपाईंहरूले लगानी मात्र गर्नुहुनेछैन बरु नेपालको समृद्धिको मार्गमा सहायता गर्नुहुनेछ र आफ्नो लगानीवापत केही नाफा पनि प्राप्त गर्नुहुनेछ । तसर्थ चिनियाँ लगानीकर्तालाई आगामी महिना नेपालमा हुने लगानी सम्मेलनमा सहभागी बन्न र नेपालमा लगानी गर्न तत्पर रहन आग्रह गर्छु , उनले भने ।
कार्यक्रममा राजदूत पौड्यालले नेपालमा वैदेशिक लगानी प्रवर्द्धनका लागि अर्को महिना लगानी सम्मेलन गर्न लागिएको बताए । नेपालमा राजनीतिक स्थिरता रहेको र राजनीतिक समस्याहरू प्रजातान्त्रिक तवरले हल गरेको जानकारी दिँदै राजदूत पौड्यालले नेपालमा लगानीका लागि निर्णय गर्ने यो सबैभन्दा सही समय भएको धारणा राखे ।
कार्यक्रममा विभिन्न व्यावसायिक प्रतिष्ठानका प्रतिनिधिहरूले नेपालमा लगानीका अवसर, चुनौती, सरकारी तहबाट हुने सहजीकरण, कानुनी व्यवस्थालगायतका पक्षमा चासो व्यक्त गरेका थिए । उपस्थित लगानीकर्ता तथा प्राज्ञिक समुदायले चीनमा आयोजना गरिएको यस प्रकारको पूर्वतयारीको प्रशंसा गर्दै नेपालमा ठूलो मात्रामा चिनियाँ लगानी हुने बताएका छन् ।
