काठमाडौ:क्यामरुनको दाउफिन्सले नेपाल पुलिस क्लवलाई हराउदै पोखरामा जारी २१ औं संस्करणको आहा रारा गोल्डकप फुटबलको सेमिफाइनलमा प्रवेश गरेको छ ।
मंगलबार भएको अन्तिम क्वाटरफाइनलमा साबिकको विजेता नेपाल पुलिस क्लबलाई अतिरिक्त समयमा २–१ गोल अन्तरले पराजित गर्दै दाउफिन्सले अन्तिम चारमा स्थान तय गरेको हो ।
पोखरा रंगशालामा निर्धारित समयको खेल १–१ को बराबरीमा सकिएपछि खेल अतिरिक्त समयमा गएको थियो । अतिरिक्त समयको चौथो मिनेट मै गोल गर्दै दाउफिन्सले सेमिफाइनल यात्रा तय गर्याे । अतिरिक्त समयमा दाउफिन्सका लागि यात्रिक ओवानाले गोल गरे ।
यो जितसंगै दाउफिन्सले पुलिसविरुद्ध लगातार दोस्रो दिन जित निकालेको छ । पुलिस र दाउफिन्स २४ घण्टा बित्न नपाउँदै प्रतिस्पर्धा गरेका हुन् ।
सोमबार भएको तिलोत्तमा गोल्डकपको फाइनलमा दुई क्लबले प्रतिस्पर्धा गरेका थिए । जसमा पुलिस क्लब सडन डेथमा दाउफिन्ससंग पराजित भएको थियो ।
प्रतियोगिताको विजेता टिमले ८ लाख र उपविजेता टिमले ४ लाख रुपैयाँ प्राप्त गर्नेछ ।
प्रकाशित मिति: मंगलबार, फागुन १४, २०७५
