भीमदत्तनगर : सम्झौता गर्दा २०७३ असोजमै सक्नुपर्ने कञ्चनपुरको कृष्णपुर नगरपालिका–१ दोमिल्लास्थित धारापानी सिँचाइ आयोजना अझै सम्पन्न हुन सकेको छैन ।
२ प्याकेजमा ठेक्का सम्झौता गरिएको भए पनि पानीको मुहान (इन्टेक)तर्फको निर्माणको जिम्मा पाएको ‘आशिष कन्ट्रक्सन धनगढी’ले दुईपटक समयावधि थप गर्दा पनि काममा ढिलासुस्ती गरेको पाइएको छ । पछिल्लो समय निर्माण पक्ष सम्पर्कमा नआए पनि सिँचाइको पाइप बिछ्याउने काम भइरहेको छ ।
दोस्रो पटक काम गर्न समय थप गरे पनि वर्ष दिन बितिसकेको जलस्रोत तथा सिँचाइ विकास डिभिजन कार्यालय भीमदत्तनगरले जनाएको छ । सिँचाइ आयोजनाको नहर, कल्भर्टलगायत पूर्वाधार निर्माणका लागि उक्त निर्माण कम्पनीसित २०७२ असार २५ मा ४ करोड १५ लाखको सम्झौता भएको थियो । कार्यालयबाट लिखित रूपमा ताकेता गर्दा समेत ठेकेदार कम्पनीले बेवास्ता गर्दै आएको छ ।
‘हालसम्म गरेको कामबापतको २ करोड ६७ लाख भुक्तान लिइसकेको छ,’ जलस्रोत तथा सिँचाइ विकास डिभिजन कार्यालयका प्रमुख अजितकुमार श्रीवास्तवले भने । कृष्णपुर नगरपालिकाको ३०० हेक्टर जमिनमा सिँचाइ पुग्ने गरी सो आयोजना निर्माण थालिएको थियो ।
त्यसैगरी, कृष्णपुर नगरपालिकाकै बंक–नायल–बुडर सडकखण्डअन्तर्गत खार खोला र ओदाली खोलामा पुल निर्माण सम्झौता सकिएको १ वर्ष बितिसक्दा पनि पुल निर्माण हुन सकेको छैन । पुल निर्माणको जिम्मा पाएको ‘थेगिम गाल्वा कन्सट्रक्सन’ले निर्माणमा गरेको बेवास्ताका कारण पुल कहिले बनिसक्ने भन्नेमा स्थानीयवासी चिन्तित छन् । हालसम्म पुलको पिल्लर निर्माणबाहेक अरू कुनै काम भएको छैन ।
२०७३ साल भदौमा ठेक्का सम्झौता भएको पुल निर्माणको काम २०७४ फागुनमा सक्नुपर्ने थियो । तोकिएको समयभन्दा १ वर्ष बढी बितिसक्दा पनि निर्माण कम्पनी मौन छ । वर्षात्को बेला पुल नहुँदा हिँड्डुल गर्न समस्या हुने गरेको स्थानीयवासी सुनिल भण्डारीले बताए । पुल निर्माणमा निकै ढिलासुस्ती भएको छ । काम नगर्नेलाई छुट दिन नहुने उनको भनाइ छ ।
ओदाली खोलाको बीच भागमा एउटा मात्रै पिल्लर गाडिएको छ । खार खोलामा पिल्लर उठाउने काम सुस्त गतिमा छ । डिभिजन सडक कार्यालय कञ्चनपुरले पुल निर्माणमा बेवास्ता गर्ने उक्त निर्माण कम्पनीमाथि कारबाही प्रक्रिया अघि बढाइएको जनाएको छ । खार खोलाको ६० प्रतिशत काम सकिएको छ । ओदाली खोलाको २५ प्रतिशत मात्रै काम भएको छ । डिभिजन सडक कार्यालय कञ्चनपुरका प्रमुख लक्ष्मीदत्त भट्टले पुल निर्माण कम्पनीलाई समयमै काम सक्न पटक-पटक पत्राचार गरिएको बताए । उनले कम्पनीलाई आगामी चैत मसान्तभित्र काम सक्न समयावधि दिइएको बताए । खार खोलामा पुल निर्माणका लागि ६ करोड ५९ लाख ६७ हजारमा ठेक्का सम्झौता भएको थियो भने ओदाली खोलामा ५ करोड ४७ लाख ४ हजारमा ठेक्का सम्झौता भएको थियो ।
प्रकाशित मिति: सोमबार, फागुन १३, २०७५
