भद्रपुर : झापाको भद्रपुर नगरपालिका–३ मा बौलाह कुकुरले टोकेर दुहुना गाईसहित डेढ दर्जनभन्दा बढी पशु चौपाया मरेका छन् । गोठमा बाँधिएका तथा चरनमा छाडिएका गाई, राँगा, बाछाबाछी, खसीबाख्रालगायतलाई बौलाह कुकुरले टोकेपछि रेबिज लागेर मरेका हुन् ।
वडा नं. ३ सूर्यनगरका विसु मर्डीले पालेको कुकुर बौलाएपछि सन्थाल बस्तीमा सबैभन्दा बढी चौपाय मरेको भद्रपुर नगरपालिकाका पशु सेवा शाखाका प्राविधिक गणेश भट्टाराईले बताए । हाल सूर्यनगर र मङ्गलबारे क्षेत्रका पशु तथा मानिसलाई रेबिजविरुद्धको खोप लगाइरहेको प्राविधिक भट्टाराईले बताए । आइतबार मात्र सो क्षेत्रमा मानिस र चौपायालाई गरी १४ वटा रेबिजविरुद्धको खोप लगाइएको छ ।
उनले भेटेरिनरी अस्पताल तथा पशु सेवा केन्द्रका प्रमुख डा. पशुपति ढुङ्गानाले निःशुल्क खोप उपलब्ध गराएको बताए । कुनै पनि जनावर मार्न नपाइने अन्तर्राष्ट्रिय मान्यताका कारण कुकुरलाई बन्ध्याकरण गरी प्रजननदर घटाउन भद्रपुर नगरपालिकाले प्रत्येक वर्ष शिविर सञ्चालन गर्दै आएको छ ।
भद्रपुर नगरपालिका प्रमुख जीवनकुमार श्रेष्ठले सडकमा हिँड्ने कुकुरको बन्ध्याकरण गरी सङ्ख्या घटाए पनि घरपालुवा कुकुरलाई रेबिजविरुद्धको खोप नलागाई पाल्ने गरेकाले समस्या आएको बताए ।
प्रकाशित मिति: सोमबार, फागुन १३, २०७५
