काठमाडौं : नेपाल र नेपालीका लागि एउटा खुसीको खबर छ । विश्व प्रसिद्ध लोन्ली प्लानेटले विश्वका घुम्नलायक विश्वका उत्कृष्ट १० शहरमध्ये काठमाडौँको नामसमेत समेटेको छ । यसले नेपालमा पर्यटक भित्र्याउन सरकार र निजी क्षेत्रले गरिरहेको सार्थक प्रयत्नलाई समेत बल दिएको छ ।
पर्यटन प्रवर्द्धन, प्रचार प्रसारमा काम गर्दै आएको लोन्ली प्लानेटले सन् २०१९ का घुम्नलायक उत्कृष्ट १० शहरको सूचीमा काठमाडौंलाई समावेश गरेर नेपालको पर्यटन प्रवर्द्धनमा सहयोग पुर्याएको छ ।
सन् २०२० लाई नेपाल सरकारले नेपाल भ्रमण वर्ष घोषणा गरेको र सो अवधिमा २० लाख पर्यटक भित्र्याउने लक्ष्यसहितका नीति तथा कार्यक्रम सार्वजनिक गरेको सन्दर्भमा लोन्ली प्लानेटको पछिल्लो विवरणले थप बल पुर्याएको छ ।
वि.सं. २०७२ को गोरखा भूकम्पले क्षति पुर्याएका पूरातात्त्विक महत्त्वका सम्पदाको पुनर्निर्माणले गति लिएको र धेरैजसो पुनर्निर्माण पनि सम्पन्न भइसकेको भन्दै काठमाडौं घुम्नलायक शहरको रूपमा रहेको उक्त संस्थाको ठहर छ ।
मन्दिर, कला र संस्कृतिले भरिपूर्ण काठमाडौं उपत्यकामा पछिल्लो समय सूचना तथा प्रविधिको पनि सहज प्रयोग गर्न पाइने पनि विवरणमा उल्लेख छ ।
क्षति भएका पूरातात्त्विक महत्त्वका सम्पदाको पुनर्निर्माण तथा नेपालीको पाहुनालाई स्वागत गर्ने शैलीका कारण पनि जो कोहीलाई आकर्षित गर्न सक्छ । यस्तै, पुराना स्मारक तथा अन्य परंपरागत कला कौशल पनि पर्यटकका लागि अर्को आकर्षणको विषय बन्न सक्छ । ढुंगेधारा, हिटी, देवल तथा काठमाडौँ, पाटन र भक्तपुर दरबार स्वायर पर्यटकका लागि खुला सङ्ग्रहालय जस्तै लाग्न सक्छ ।
ट्रेकिङ एजेन्ट्स एसोसिएसन अफ नेपाल (टान)का अध्यक्ष नवराज दाहालले विश्व प्रसिद्ध पर्यटनसम्बन्धी जानकारी दिने लोन्ली प्लानेटले काठमाडौंलाई सन् २०१९ को घुम्नलायक उत्कृष्ट १० शहरमा राख्नु नेपाल र नेपालीका लागि खुसीको विषय भएको प्रतिक्रिया दिए ।
नेपालको पर्यटनलाई अन्तर्राष्ट्रियस्तरमा प्रवर्द्धन गर्न यस्ता विषयले पनि महत्त्वपूर्ण भूमिका निर्वाह गर्ने उनको भनाइ छ । उनले सरकारले सन् २०२० लाई नेपाल भ्रमण वर्ष घोषणा गरेको र २० लाख पर्यटक भित्र्याउने बताइरहेका बेला काठमाडौं उपत्यकामा बाँकी रहेको पुनर्निर्माण, ट्राफिक जाम तथा अन्य केही समस्या भने समयमै हटाउनेतर्फ पहल गर्नुपर्ने बताए ।
पर्यटकको सङ्ख्या मात्रै बढाउने नभई गुणस्तरीय पर्यटनमा समेत जोड दिएको सन्दर्भमा विश्व प्रसिद्ध संस्थाहरूको घोषणा सकारात्मक भए पनि चुनौती हुने अध्यक्ष दाहालको टिप्पणी छ ।
प्लानेटले घुम्नलायक उत्कृष्ट १० शहरको पहिलो नम्बरमा डेनमार्कको कोपनहेगन, दोस्रोमा चीनको सेन्जेन, तेस्रोमा सर्वियाको नोभिसाड, चौथोमा अमेरिकाको मियामी, पाँचौँमा काठमाडौँ, छैटौँमा मेक्सिकोको मेक्सिको शहर, सातौँमा सेनेगलको डकार, आठौँमा अमेरिकाको सियाटल, नवौँमा क्रोएसियाको जदार र दशौँमा मोरक्कोको मेक्नेसलाई घुम्नलायक उत्कृष्ठ १० शहरमा समावेश गरेको छ ।
प्रकाशित मिति: आइतबार, फागुन ५, २०७५
