भारतमा जारी हिरो गोल्डकप प्रतियोगिताको अन्तिम चरणको खेलमा आज नेपाल र म्यान्मा भिड्दै छन् ।
भारतको उडिसास्थित कालिङ्गा रंगशालामा हुने खेल नेपाली समयअनुसार साँझ ६ बजे सुरु हुनेछ । नेपालको राष्ट्रिय महिला फुटबल टोली आज विजयी भए पहिलो अन्तर्राष्ट्रिय उपाधि पाउनेछ ।
दक्षिण एसियाली फुटलबमा सधैँ उपाधिका लागि तगारो बन्दै आएको भारतलाई समूह चरणमै पराजित गरेपछि नेपालले अन्तिम चरणमा म्यान्मालाई प्रतिद्वन्द्वी पाएको हो ।
समूह चरणको पहिलो खेलमा नेपाल म्यान्मासँग ३–० गोल अन्तरले पराजित भएकामा पछिल्ला दुई खेलमा भने भारत र इरानलाई पराजित गर्दै अन्तिम चरणसम्म पुगेको थियो । म्यान्मा भने लिग चरणका सबै खेलमा विजयी बन्दै अन्तिम चरणमा पुगेको हो ।
विश्व वरीयतामा नेपालभन्दा निकै माथि रहेको म्यान्मालाई हराउँदै महिला फुटबलको इतिहासमा उपाधि जित्ने अवसर नेपाली महिला टोलीलाई छ । फिफा वरीयतामा नेपाल १०८ स्थानमा रहँदा म्यान्मा ४४औँ स्थानमा रहेको छ ।
नेपाल सन् २०१०, २०१२, २०१४ को साफ महिला च्याम्पियनसीपको अन्तिम चरणमा भारतसँग पराजित भएको थियो । यस्तै, सन् २०१० र २०१६ मा दक्षिण एसियाली खेलकुद (साग)मा पनि नेपाल भारतसँगै पराजित भएको थियो ।
नेपाल र म्यान्मा चार महिनायता तेस्रो पल्ट भिड्न लागेका हुन् । गत नोभेम्बरमा म्यान्माको राजधानी याङ्गुनमा भएको ओलम्पिक २०२० अन्तर्गत एसियाली छनोटको पहिलो चरणको भेटमा नेपालले म्यान्मालाई १–१ मा रोके पनि त्यसलाई नेपालले हिरो गोल्डकपको पहिलो खेलमा भने निरन्तरता दिन सकेन । अन्तिम चरणमा फेरि म्यान्मालाई रोक्ने प्रयास गर्ने प्रशिक्षक हरि खड्काले बताए ।
हामी अन्तिम चरणमा अलिक रणनीति बदलेर खेल्नेछौँ । हामीले पहिला गोल खाएनौँ भने जित्न सक्छौँ किनभने सुरुमै गोल खायौँ भने हाम्रा खेलाडीले सन्तुलन गुमाउने गरेका छन्’, प्रशिक्षक खड्काले भने ।
प्रकाशित मिति: शुक्रबार, फागुन ३, २०७५
