काठमाडौं । टोटनह्याम र चेल्सी ईएफएल कप फुटबलको सेमिफाइनलमा प्रवेश गरेका छन् ।
गएराति भएको खेलमा जित निकाल्दै दुवै टिमले अन्तिम चारमा स्थान बनाएका हुन् । टोटनह्यामले ईएफएल कप फुटबलमा बलियो प्रतिद्वन्द्वी आर्सनललाई पराजित गरेको हो ।
बुधबार राति भएको क्वाटरफाइनल खेलमा टोटनहृयामले आर्सनललाई २–० गोलअन्तरले पराजित गर्यो । टोटनह्यामको जितमा डेले अली र ह्युङ मिन सनले एक एक गोल गरे ।
खेलको २०औं मिनेटमा नै सनले गोल गर्दै टोटनहृयामलाई अग्रता दिलाएका थिए । खेलको पहिलो हाफसम्म एक गोलले अघि रहेको टोटनहृयामले आर्सनलविरुद्ध दोस्रो हाफमा थप एक गोल गर्न सफल भयो ।
खेलको ५९औं मिनेटमा टोटनहृयामका अलीले गोल गर्दै २–० को जित दिलाए ।
बुधबारराति नै भएको अर्को खेलमा चेल्सीले बर्नमाउथलाई हराउँदै अन्तिम चारमा स्थान बनाएको छ । चेल्सीको जितमा खेलको ८४ औं मिनेटमा इडेन हाजार्डले निर्णायक गोल गरे ।
प्रकाशित मिति: बुधबार, पुस ४, २०७५
