काठमाडौं । भैरहवा ग्लाडियटर्स काठमाडौंमा जारी तेस्रो संस्करणको एभरेष्ट प्रिमियर लिग (इपिएल) क्रिकेटको प्लेअफमा पुगेको छ ।
कीर्तिपुरस्थित त्रिवि मैदानमा भएको पहिलो खेलमा विराटनगर वारियर्सलाई चार विकेटले पराजित गर्दै भैरहवा लगातार तेस्रो जितसहित प्लेअफमा पुगेको हो ।
पारस खड्काको कप्तानीमा रहेको विराटनगरले दिएको ९२ रनको सामान्य लक्ष्य भैरहवाले १९ ओभर ४ बलमा ६ विकेट गुमाएर पुरा ग¥यो । भैरहवाका लागि रायन टेन डोसकाटेले २० रन बनाए ।
यस्तै कप्तान शरद भेषावकरले १६, रवी इन्दर सिंहले १२, प्रदीप ऐरीले १० रन बनाए भने रोहित पौडेल सात रनमा नटआउट रहे । विराटनगरका भान डेर मेर्वीले दुई विकेट लिए ।
टस हारेर पहिले ब्याटिङ गरेको विराटनगरले १८ ओभर ४ बलमा सबै विकेट गुमाउँदै ९१ रन मात्र बनाएको थियो ।
विराटनगरका लागि भान डेर मेर्वीले २५, करण केसीले १८, सुमित महर्जनले १५ रन बनाएका थिए भने हरिबहादुर चौहान १३ रनमा नटआउट रहेका थिए ।
विराटनगरलाई ९१ रनमै समेट्ने क्रममा भैरहवाका लागि मोहमद नाभिदले चार विकेट लिए । यस्तै कृष्ण कार्की र अविनाश बोहोराले दुई दुई विकेट लिए ।
विराटनगरविरुद्धको जीतसँगै भैरहवाले तीन खेलबाट छ, अंक जोड्दै प्लेअफमा स्थान सुरक्षित बनाएको छ ।
अब भैरहवाले ललितपुर र काठमाडौंसँग खेल्न बाँकी छ । यसअघि पहिलो खेलमा भैरहवाले पोखरा राइनोज र दोस्रो खेलमा चितवन टाइगर्सलाई पराजित गरेको थियो ।
दुई खेलमा चार अंक जोडेको विराटनगर तेस्रो स्थानमा छ । विराटनगरले पहिलो खेलमा ललितपुर र दोस्रो खेलमा पोखरालाई पराजित गरेको थियो ।
सोही मैदानमा आज हुने दोस्रो खेलमा काठमाडौं किंग्स ११ र ललितपुर प्याट्रियसबीच खेल भइरहेको छ ।
प्रकाशित मिति: मंगलबार, मंसिर २५, २०७५
