काठमाडौँ । राजस्व अनुसन्धान विभागले तनहुको शुक्लागण्डकी स्थाई ठेगाना भई काठमाडौँको शान्तीनगर बस्ने सुनिल पौडेल बिरुद्ध राष्ट्र बैंकको स्वीकृतिवेगर बिदेशी बैँकमा खाता खोलेको आरोपमा जिल्ला अदालत काठमाडौँमा बुधबार मुद्धा दायर गरेको छ । पौडेलले सिङ्गापुरको युनाइटेड ओभरसिज बैंकमा खाता खोली ५८ हजार अमेरिकि डलर जम्मा गरेको पाइएपछि काठमाडौँ जिल्ला अदालतमा तेब्बर माग दाबी सहित मुद्धा दायर गरेको राजस्व अनुसन्धान विभागले बिज्ञप्तीमार्फत जानकारी गराएको छ । नेपालको बिद्यमान कानुनी व्यवस्था अनुसार विदेशी बैंकमा खाता खोल्दा नेपाल राष्ट्र बैंकको स्वीकृति लिनुपर्ने हुन्छ ।
पौडेलको यो कार्य विदेशी विनिमय ऐनको व्यवस्था विपरितको कसुर भएकाले उनले जम्मा गरेको अमेरिकि डलर बराबर हुन आउने नेपाली रुपैयाँ सतहत्तर लाख पैतालिस हजार नौ सय जरिवाना मागदाबी र सोही ऐनको दफा १७ को उपदफा १ बमोजिम विगोको तेब्बर अर्थात दुई करोड बत्तिस लाख सैतिस हजार सात सय रुपैयाँ जरिवाना समेत माग गरिएको राजस्व अनुसन्धान विभागले जनाएको छ । बिभिन्न प्रकरणमा विशेष अदालतमा भ्रष्टाचार मुद्धा खेपिरहेका सुनिल पौडेल राष्ट्रिय सूचना प्रबिधि केन्द्रका कार्यकारी निर्देशक तथा नेपाल टेलिकमका प्रबन्ध निर्देशक रहिसकेका छन।
प्रकाशित मिति: बुधबार, साउन २, २०८१
