काठमाडौँ। रौतहटका १८ वटा पालिकालाई हिउँदे वा वर्षे बिदाबाट जाडो बिदा दिनका लागि शिक्षा विकास तथा समन्वय इकाइले आग्रह गरेको छ ।
इकाइ कार्यालय गौरले एक सूचना प्रकाशित गरी यस्तो आग्रह गरेको हो । त्यसअनुसार कतिपय विद्यालयहरूले बिदा दिन थालेका छन् । शिक्षा नियमावली २०५९ को नियम ८५ को उपनियम तीन मा तोकिएबमोजिम बिदा दिन सूचनामा भनिएको छ ।
एक शैक्षिक सत्रमा हिउँद बिदा वा बर्षे बिदा वा दुवै गरी ४५ दिन विद्यालय बन्द रहने प्रावधान बमोजिम बर्षे बिदा सञ्चित रहेकोबाट आवश्यकता अनुसार जाडो बिदा दिन सुझाव दिएको छ । शिक्षा विकास तथा समन्वय इकाइ कार्यालय गौरका प्रमुख रामविनय सिंहद्वारा हस्ताक्षरित सूचनामा जाडो अत्यधिक बढेकाले बिदा दिन आग्रह गरिएको हो ।
चन्द्रपुर नगरपालिका शिक्षा युवा तथा खेलकुद शाखाले सामुदायिक तथा संस्थागत विद्यालयलाई पुस २४ गते देखि माघ पाँच गतेसम्म बिदा दिएको जनाएको छ । चन्द्रपुर नगरपालिका वडा नं. पाँच मा रहेको जनज्योति माध्यमिक विद्यालयले १३ दिन जाडो बिदा दिएको छ ।
चन्द्रपुर नगरपालिका शिक्षा, युवा तथा खेलकुद शाखा चन्द्रनिगाहपुरको मिति २०८०-९-२३ को च.नं. ३३९ को पत्रानुसार शैक्षिक क्यालेण्डर २०८० बमोजिमको बाँकी रहेकाले १३ दिन बिदा मध्ये कट्टा हुने गरी बिदा दिएको उल्लेख गरेको छ । जनज्योति माध्यमिक विद्यालयले सोमबार निकालेको सूचनामा पुस २४ गतेदेखि माघ पाँच गते शुक्रबारसम्म विद्यालयको पठन पाठन बन्द गरिएको जनाएको छ ।
विद्यालयको पठनपाठन माघ सात गतेदेखि यथावत् विद्यालय सञ्चालन हुने जारी सूचनामा उल्लेख छ । तर यस बीचको अवधिमा सार्वजनिक बिदाबाहेक विद्यालय प्रशासन भने खुल्ला रहने जानकारी गराएको छ ।
केही दिनदेखि अत्यधिक चिसो बढेकाले बालबालिकाको स्वास्थ्यमा पर्न सक्ने प्रतिकूल असरलाई मध्यनजर गर्दै जाडो बिदा दिएको जनज्योति माध्यमिक विद्यालय चन्द्रनिगाहपुरले जनाएको छ । यस अवधिमा आफ्नो बालबालिकालाई घरमै अध्ययन गराउनका लागि अभिभावकलाई आग्रह समेत गरिएको छ ।
प्रकाशित मिति: मंगलबार, पुस २४, २०८०
