काठमाडौँ । लक्ष्मी स्टिल र सर्वोत्तम सिमेन्टले ५०० जना दैनिक ज्यालादारीमा काम गर्ने कर्मचारीलाई बिदा गरेको छ । नेपाल विद्युत् प्राधिकरणले ट्रंक र डेडिकेटेड लाइन प्रयोग गरेबापत बक्यौता रकम नतिरेको भन्दै धमाधम लाइन काटेपछि उनीहरूलाई बिदा गरिएको हो ।
सर्वोत्तम सिमेन्ट र लक्ष्मी स्टिलमा १ हजार ५०० जना प्रत्यक्ष रोजगारीमा संलग्न रहेको बताइएको छ । लक्ष्मीले ७४ करोड १० लाख र सर्वोत्तमले ६८ करोड ९० लाख रुपैयाँ बक्यौता तिर्न बाँकी रहेको प्राधिकरणले जनाएको छ । तर, यी उद्योगले भने आफूहरूले कुनै पनि रकम तिर्न बाँकी नरहेको दाबी गरेका छन् ।
यता, रिलायन्स स्पिनिङ मिल्सले २० प्रतिशत उत्पादन गरिरहेको छ । यस उद्योगमा ३ हजार ५०० मजदुर रहेका छन् । उद्योगी शशिकान्त अग्रवालका अनुसार यही रेसियोमा उद्योग बन्द गर्ने हो भने मासिक १० करोड रुपैयाँ घाटामा जानेछ । रिलायन्सले केही दिनमै कर्मचारी कटौतीको सूचना जारी गर्ने बताएको छ ।
रिलायन्सले १ अर्ब ९४ करोड रुपैयाँ बक्यौता तिर्न बाँकी रहेको प्राधिकरणको भनाइ छ । बिजुलीको लाइन काटिएपछि आफूहरूको रोजगार सङ्कटमा परेको भन्दै मजदुरहरुले आज बारामा आन्दोलन गरेका छन् ।
हालसम्म ९ वटा उद्योगको लाइन कटिएको छ । लाइन काटिएको अधिकांश उद्योगले कामदार कटौती गर्न थालेका छन् ।
प्रकाशित मिति: बुधबार, पुस ११, २०८०
-1733641946.jpg)
-1732776560.jpg)
-1732776560.jpg)
