काठमाडौँ । प्रधानमन्त्री पुष्पकमल दाहाल ‘प्रचण्ड’ले एनसेलको सेयर खरिदबिक्रीका क्रममा विदेशमा भएका गतिविधिमा अनुसन्धानबाट कानुन विपरीत पाइए हदैसम्म कारबाही हुने प्रतिबद्धता जनाएका छन् ।
प्रतिनिधि सभाको राज्य व्यवस्था तथा सुशासन समितिको मङ्गलवारको बैठकमा प्रधानमन्त्री दाहालले एनसेलको सेयर खरिदबिक्रीका क्रममा कानुनविपरीत गतिविधि भएको पाइएकाले छानबिन समिति गठन गरिएको बताए । छानबिन समितिबाट देखिएका निष्कर्षका आधारमा सरकारले हदैसम्मको कारबाही गर्ने पनि स्पष्ट पारे ।
‘प्रतिवेदन प्राप्त भएपछि सरकारले नियमन, विदेशी लगानी र विदेशी मुद्रा सटही तथा करको विषयमा आवश्यक कदम चालिन्छ । एनसेल खरिदबिक्रीमा कहीँ न कहीँ केही न केही भएको शङ्का लागेकोले छानबिन गरिएको हो । दोषी भए हदैसम्म कारबाही हुन्छ, ’उनले भने ।
प्रधानमन्त्री दाहालले एनसेलको ८० प्रतिशत सेयर न्यून मूल्याङ्कन भएको र करछलिको कुरा समाचारमा आएपछि चासो लागेर छानबिनमा लागेको बताए । उनले छानबिन समिति कुनै पनि निकायलाई ओभरल्याप गर्नका लागि गठन नगरिएको स्पष्ट पारे । उनले दूरसञ्चार प्राधिकरणका अधिकारीहरूसँगकै सल्लाहमा छानबिन समिति गठन गरिएको र १ महिनाको कार्यादेश दिइएको पनि बताए । समिति गठन कर मात्रै नभई विदेशी लगानी ल्याउने र राजश्वमा पर्ने विषयमा पनि सुझाव आउने बताए ।
प्रकाशित मिति: मंगलबार, पुस ३, २०८०
