काठमाडौँ । मेडिकल व्यवसायी दुर्गा प्रसाईँले सर्वोच्च अदालतमा बन्दी प्रत्यक्षीकरणको रिट निवेदन दर्ता गराएका छन् । प्रसाईँको पक्षबाट वरिष्ठ अधिवक्ता डा. सुरेन्द्र भण्डारीले शुक्रबार सर्वोच्चमा रिट निवेदन दर्ता गराएका हुन् ।
राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालका संयोजकसमेत रहेका प्रसाईँले संविधानले दिएको मौलिक हक विपरित आफूलाई सुरक्षाकर्मीले निवासमा सीमित राखेपछि सर्वोच्चमा बन्दी प्रत्यक्षीकरणको रिट निवेदन दर्ता गराएका हुन् । उक्त रिट निवेदनमाथि आइतबार सुनुवाइ हुने भएको छ ।
भक्तपुरस्थित उनको निवास वरिपरी प्रहरी तैनाथ गरिएको छ । सुरक्षाका कारण उनलाई थप निगरानीमा राखिएको जिल्ला प्रशासन कार्यालय भक्तपुरले जनाएको छ । बिहीबार बल्खुमा केन्द्रित रहेर विरोध प्रदर्शन गरेको प्रसाईँ समूहले शुक्रबार तिनकुनेमा प्रदर्शन गर्ने तयारी गरेपछि उनीमाथिको सुरक्षा निगरानी बढाइएको हो ।
प्रकाशित मिति: शुक्रबार, मंसिर ८, २०८०
