काठमाडौँ। जनमत पार्टीका अध्यक्ष डा.सीके राउतले निर्वाचन जित्ने र मन्त्री बन्ने मात्रै रहर नभएको बताएका छन् ।
तिहार, नेपाल संवत् ११४४ तथा छठ पर्व २०८० को अवसरमा शुभकामना चियापान कार्यक्रममा उनले मन्त्री बन्ने मात्रै आफ्नो रहर नभएको बताए। उनले दीर्घकालीन योजनाका साथ देश विकासमा आफू अघि बढेको बताए ।
राउतले भने, ‘यो निर्वाचन जित्ने मात्रै रहर होइन, मन्त्री बन्ने मात्रै पनि रहर होइन, मन्त्री बन्ने भए म बनिसक्थे, मन्त्री बन्ने मात्रै रहर नभएको हुनाले हामी अझ दीर्घकालीन योजनाका साथ अघि बढ्दै छौँ । यसमा सबैको साथ सहयोग आवश्यक छ।’
उनले संसदीय व्यवस्था नामको मात्रै भएको भन्दै दुई, तीन जना नेताले जे निर्णय गर्छन् त्यही लागू हुने व्यवस्था विद्यमान रहेको बताए ।
जनमत पार्टीले एक दशकभन्दा बढी सङ्घर्ष गरेर, जनताको भावना बुझे उठाएको पार्टी भएको भन्दै पार्टी जनताको मत अनुसार चल्ने पनि उनको भनाई छ ।
उनले भने, जुन संसदीय व्यवस्था भन्ने गरिन्छ, तर त्यहाँ संसदले भनेको केही कुरा लागू हुँदैन। दुई, तीन जना नेताले जे निर्णय गर्छन्, त्यही कुरा लागू हुने व्यवस्था विद्यमान छ । दुई, चार जना नेताले मात्रै ३० वर्ष देश चलाई रहेको छन् ।
त्यसलाई चिर्नको लागि जनताले के चाहेको हो । जनताले गाँस, बास, कपास, शिक्षा, स्वास्थ्य, रोजगारी, सामाजिक सुरक्षा यी सबै कुरा चाहेको हो, त्यो कुराहरूलाई सम्बोधन गर्न, जनताको मत अनुरूपको पार्टी जनमत पार्टी हो ।
उनले आगामी दिनमा जनमत पार्टी देशको भविष्य बन्ने हिसाबले वैकल्पिक रूपमा स्थापित भएको भन्दै पुरानो पार्टीबाट दिक्क भएका जनताले जनमत पार्टीमा आशा राखेका बताए ।
राउतले भने, ‘आगामी दिनमा जनमत पार्टी देशको भविष्य बन्ने हिसाबले वैकल्पिक रूपमा स्थापित भएको छ । पुरानो पार्टीबाट दिक्क भएका जनताले हाम्रो पार्टीमा आशा राखेका छन् ।
त्यो आशा भएपछि हाम्रो काँधमा एउटा ठूलो जिम्मेवारी हुन्छ कि हामीले जनताको इच्छा अनुसार काम गर्ने र विकासको काम गर्न सक्नु पर्छ ।
त्यही कारण जनमत पार्टीलाई राष्ट्र व्यापी रूपमा विस्तार गर्दै छौ । विशुद्ध रूपमा देशको विकासको लागि लागिरहेका छौँ यसमा सबैको साथ सहयोग आवश्यक हुन्छ ।’
प्रकाशित मिति: शुक्रबार, कात्तिक १७, २०८०
