काठमाडौँ । संघीय संसद अन्तर्गतका विभिन्न तीन समितिको बैठक आज (मंगलबार) बस्ने भएको छ ।
प्रतिनिधिसभाका कानून, न्याय तथा मानव अधिकार समिति, कृषि सहकारी तथा प्राकृतिक स्रोत समिति र राष्ट्रिय सभाको विधायन व्यवस्थापन समितिको बैठक बस्न लागेको हो ।
कानून, न्याय तथा मानव अधिकार समितिमा नेपालका बाल सुधार गृहमा रहेका बालबालिकाहरूको मानव अधिकारको अवस्था र बाल सुधार गृह, भक्तपुर; बाल सुधार गृह, वीरगञ्ज र जयेन्दु बाल सुधार गृह, बाँकेमा भएको घटनाका सम्बन्धमा समितिमा छलफल हुने भएको छ ।
सिंहदरवारस्थित समितिको सभाकक्षमा बिहान ११:०० बजे बस्ने बैठकमा नेपालका कारागारहरूमा रहेका कैदी र थुनुवाहरूको मानव अधिकारको अवस्थासम्बन्धी विषयमा छलफल गरिने संघीय संसद सचिवालयले जनाएको छ ।
यस्तै, प्रतिनिधिको कृषि सहकारी तथा प्राकृतिक स्रोत समितिको बैठक पनि दिउँसो १ बजे बोलाइएको छ । बैठकमा माछा, दूध, मल र चिनीको बिक्री वितरणमा रहेका समस्या सम्बन्धमा कृषि तथा पशुपंक्षी विकास, उद्योग, वाणिज्य तथा आपूर्ति, गृह र अर्थ मन्त्रालयसँग छलफल गरिने छ ।
साथै खाद्य स्वच्छता सम्बन्धी विधेयकको प्रगति विवरण सम्बन्धमा पनि समितिमा छलफल हुने सचिवालयले उल्लेख गरेको छ ।
यता खाद्य अधिकार तथा खाद्य सम्प्रभूता सम्बन्धी ऐन, २०७५ को दफा १९ को कार्यान्वयन मापन सम्बन्धमा छलफलका लागि राष्ट्रिय सभाको विधायन व्यवस्थापन समितिको पनि बैठक बोलाइएको छ । बैठक दिउँसो १ बजे समिति सभाकक्ष सिंहदरवारभित्र बस्दै छ ।
प्रकाशित मिति: मंगलबार, कात्तिक १४, २०८०
