काठमाडौँ -स्रष्टा शिवप्रसाद जैशीको उपन्यास 'बाँठी' सार्वजनिक भएको छ । नेपाल प्रज्ञा प्रतिष्ठानमा शनिबार पूर्वउपप्रधानमन्त्री भीम रावलले उक्त पुस्तक सार्वजनिक गरेका हुन् ।
महिलामा हुने बाँझोपनले झेल्नु पर्ने सामाजिक विभेदलाई जैशीले उपन्यासको विषयवस्तु बनाएका छन् । अछामीहरुले बाझोपन भएको महिलालाई बाँठी भन्ने गरेका छन् । उपन्यासमा बाँझोपनको समस्या रहेकी गौमतीलाई मुख्यपत्रको रुपमा उभ्याइएको छ ।
डा. रावलले अछामको केन्द्रीयतामा यहाँको संस्कार, संस्कृति, भाषा र समस्यालाई गहिरोसँग पक्रेर उपन्यास कृति प्रकाशित गरेकामा कृतिकारलाई बधाइ दिँदै बिग्रँदै गएको राजनीतिक पर्यावरण सुधार्न स्रष्टाहरूले सक्रियतापूर्वक कलम चलाउनु पर्ने आवश्यकता रहेको वताए ।
तोयानाथ भट्टराईको अध्यक्षतामा सम्पन्न लोकार्पण समारोहमा लाेकार्पित कृतिकाे समीक्षा गर्दै साहित्यकार नरनाथ लुइँटेल, महेशविक्रम शाह र डा. जीवेन्द्रदेव गिरीले ‘बाँठी’ उपन्यासमा प्रस्तुत सुदूरपश्चिमका महिलाहरूका समस्यामा केन्द्रित विविध पक्षमाथि प्रकाश परेका थिए । उनीहरुले उपन्यासको कथानक, भाषा, परिवेश र संस्कृतिमा अछामी आञ्चलिकता झल्किएकाे वताए ।
कृतिकार शिवप्रसाद जैशीले लेखकीय मन्तव्य दिँदै सिर्जनाकर्ममा आफूलाई प्रेरित गर्ने शिक्षक शिक्षिका, उत्प्रेरित गर्दै कृति प्रकाशनमा साथ सहयोग प्रदान गर्ने र समारोहमा उपस्थित भएर उर्जा प्रदान गर्ने सबैप्रति कृतज्ञता ज्ञापन गरे ।
प्रकाशित मिति: आइतबार, असार १०, २०८०
-1732776560.jpg)
