काठमाडौँ । एसीसी प्रिमियर कपमा नेपाल समूह चरणको अन्तिम खेल अगावै सेमिफाइनलमा प्रवेश गरेको छ ।
प्रिमियर कपको समूह ‘ए’ मा रहेको नेपालले सोमबार साउदी अरेबियाबीचको खेल वर्षाका कारण टससमेत नभई रद्द भएपछि नेपाल पाँच अङ्कसहित अन्तिम खेल अगावै सेमिफाइनलमा प्रवेश गरेको हो ।
समूहको शीर्ष स्थानमा रहेको नेपालले तीन खेलबाट पाँच अङ्क जोडेको छ । त्यो दोस्रो स्थानको ओमानभन्दा एक अङ्क धेरै र तेस्रो स्थानको साउदीभन्दा दुई अङ्क धेरै हो । तालिकाको चौथो स्थानमा रहेको मलेसियाले तीन खेलबाट दुई अङ्क जोड्दा दुई खेल खेलेको कतार अङ्कविहीन छ ।
नेपालले अब समूह चरणको अन्तिम खेलमा कतारसँग खेल्नेछ । उक्त खेलमा जित निकाले नेपाल समूह विजेताका रूपमा सेमिफाइनल खेल्नेछ ।
यसबाहेक, समूह ‘ए’मा अब मलेसियाविरुद्ध कतार र ओमानविरुद्ध साउदी अरेबियाबीचको खेल बाँकी छ । जसमध्ये ओमान र साउदीबीचको विजेता नेपालसँगै सेमिफाइनल प्रवेश गर्ने समूह ‘ए’ को अर्को टिम बन्नेछ । यता, मलेसिया प्रतियोगिताको अन्तिम खेल खेल्नु अगावै र कतार दुई खेल बाँकी रहँदै प्रतियोगिताबाट बाहिरिसकेका छन् ।
यसै वर्ष पाकिस्तानमा हुने तालिका रहेको एसिया कपको छनोट प्रतियोगिताको रूपमा रहेको प्रिमियर कपमा कुल १० टिम सहभागी छन् । सहभागी टिमलाई एक समूहमा पाँच टिम रहने गरी दुई समूहमा विभाजन गरिएको छ ।
प्रिमियर कपको समूह ‘ए’ नेपालसँगै ओमान, मलेसिया, साउदी अरेबिया र कतार छन् । समूह ‘बी’ मा युनाइटेड अरब इमिरेट्स (युएई), हङकङ, कुवेत, सिंगापुर र बहराइन छन् । प्रतियोगिताको विजेताले एसिया कपका स्थान बनाउनेछ ।
प्रकाशित मिति: सोमबार, वैशाख ११, २०८०
