काठमाडौँ । नेपाली राष्ट्रिय क्रिकेट टिमका स्पिनर सन्दीप लामिछाने एक दिवसीय बलिङ वरीयताको ३१औँ स्थानमा उक्लिएका छन् ।
विश्व क्रिकेटको सर्वोच्च निकाय आइसिसीले सार्वजनिक गरेको एक दिवसीय बलिङको नयाँ वरीयतामा सन्दीप गएको हप्ताको तुलनामा १२ स्थानमाथि उक्लिएका हुन् । सन्दीप गएको साता यो वरीयताको ४३औँ स्थानमा थिए ।
घरेलु मैदानमा भएको आइसिसी क्रिकेट विश्वकप लिग-२ को त्रिदेशीय शृङ्खलामा सन्दीप नेपाली टिमबाट बलिङमा सबैभन्दा प्रभावकारी देखिएका थिए । उनले शृङ्खलाका चार खेलमा १३ विकेट लिएका थिए ।
नाबालिगमाथि बलात्कार आरोपको मुद्दा अदालतमा विचाराधीन रहेकाले सन्दीप लिग-२ अन्तर्गतकै त्रिदेशीय शृङ्खलाका लागि युनाइटेड अरब इमिरेट्स (युएई) जान नपाउने भएका छन् । उच्च अदालत पाटनले उनलाई २० लाख रुपैयाँ धरौटीमा छोड्न आदेश दिएको थियो । तर, विदेश जान रोक लगाइएको छ ।
प्रकाशित मिति: शुक्रबार, फागुन १२, २०७९
