काठमाडौँ । राष्ट्रिय क्रिकेट टिमका कप्तान सन्दीप लामिछानेविरुद्ध जबरजस्ती करणीसम्बन्धी कसुरमा प्रहरीसमक्ष किटानी दर्ता भएको छ ।
प्रहरी वृत्त गौशालामा बुधबार लामिछानेविरुद्ध किटानी जाहेरी दर्ता भएको जिल्ला प्रहरी परिसर, काठमाडौँले जनाएको छ ।
आफ्ना एक साथीसँग गौशाला पुगेकी पीडितले आफूलाई कप्तान लामिछानेले दुई पटक बलात्कार गरेको गौशालाका प्रहरीसमक्ष बताएकी थिइन् । प्रहरीका अनुसार उनको उमेर १७ वर्षको छ । त्यसपछि गौशाला प्रहरीले काठमाडौँ प्रहरी प्रमुखलाई त्यसबारे जानकारी गराएको थियो ।
उपत्यका प्रहरी कार्यालय रानीपोखरीका प्रमुख रवीन्द्रबहादुर धानुकले भने, ‘बलात्कार जस्तो घटनामा प्रहरी संवेदनशील छ, हिजै स्वास्थ्य परीक्षण गराएर प्रारम्भिक अनुसन्धान थालिसक्यौँ ।’
गौशाला प्रहरीका एक अधिकृतका अनुसार काठमाडौँको एक कलेजमा अध्ययनरत पीडित युवती लामिछानेकी ‘फ्यान’ थिइन् । उनीहरूबिच सामाजिक सञ्जाल स्न्यापच्याट र ह्वाट्स एपमार्फत कुराकानी हुने गरेको थियो । सामाजिक सञ्जालमार्फत नै लामिछोनले उनीसँग भेट्ने प्रस्ताव राखेका थिए ।
‘पीडित उनको फ्यान भएकाले म्यानिपुलेट गरेको जस्तो देखिन्छ’ गौशालाका प्रहरीका ती अधिकृत भन्छन्, ‘प्रायः जसो स्न्यापच्याटमै कुरा हुने रहेछ ।’ स्न्यापच्याटमा संवाद पठाएको हेर्ने बित्तिकै आफैँ डिलिट हुन्छ ।
लामिछाने ६ भदौमा टी–२० सिरिज खेल्न केन्या गएका थिए । त्यसको अघिल्लो दिन उनले पीडितलाई पिंगलास्थानस्थित होटेल काठमाडौँ इनमा बोलाएर दुई पटक बलात्कार गरेको पीडितको भनाइ छ ।
‘केन्या जानु अघिल्लो दिन सन्दीप आफ्नो कारमा मध्य बानेश्वरस्थित होस्टल नजिकै लिन आएको थियो’ उनले प्रहरीसमक्ष भनेकी छन्, ‘त्यति बेला भक्तपुर गएका थियौँ, फर्किएर आउँदा मध्यरात भइसकेको थियो ।’
उनले सन्दीपलाई राति ८ बजेपछि होस्टल बन्द भइसक्ने बताएकी थिइन् । तर सन्दीपले ‘एक छिन एक छिन’ भन्दै ढिला गरेको पीडितको भनाइ छ ।
झण्डै ११ बजिसकेपछि सन्दीपले होटेलमा बस्ने प्रस्ताव गरेको उनको बयान छ । त्यसपछि सन्दीपले उनलाई पिंगलास्थानस्थित होटेलमा लगेका थिए । पीडितले दुई वटा कोठा लिन भने पनि सन्दीपले नमानेको प्रहरीको भनाइ छ ।
राति लठ्याएर दुई पटक बलात्कार गरेको पीडितको जाहेरीमा उल्लेख छ । प्रहरीले पिंगलास्थान र नगरकोटमा गएको होटेलको क्लोज सर्किट (सिसी) टिभी फुटेज पनि सङ्कलन गर्न थालेको छ । होटेलका कर्मचारीहरूसँग पनि सोधपुछ गरिरहेको छ ।
प्रारम्भिक जाँचमा उनी ५ भदौमा ती स्थानमा पीडितसँग गएको देखिएको प्रहरीले जनाएको छ ।
नेपाल क्रिकेट सङ्घ (क्यान) ले ४ पुस २०७८ मा लामिछानेले राष्ट्रिय क्रिकेट टिको कप्तान नियुक्त गरेको थियो । उनी २५ वर्षका छन् ।
प्रकाशित मिति: बुधबार, भदौ २२, २०७९
-1733641946.jpg)
-1732776560.jpg)
-1732776560.jpg)
