काठमाडौँ । कोरोना महामारीबाट प्रभावित अति विपन्न परिवारलाई राहत बाँड्ने विषयमा झडप हुँदा पश्चिम नवलपरासीको सरावल गाउँपालिकामा १८ जना घाइते भएका छन् ।
गाउँपालिकाको वडा नम्बर ५ मा राहत वितरण दलीय भागबण्डाका आधारमा गर्ने विषयमा कुरा नमिल्दा उत्पन्न विवादले उग्ररुप लिँदा नेपाली काँग्रेस र एमालेका जनप्रतिनिधिबीच झडप भएको थियो ।
कोरोनाका समयमा घरमा कसैको पनि आयस्रोत नभएको र सामाजिक सुरक्षा भत्तासमेत नपाउने अति विपन्न परिवारका लागि सरकारले प्रति परिवार १० हजारका दरले रकम दिने गरेको छ ।
सरावल गाउँपालिकामा ७ सय जनाका लागि ७० लाख रुपैयाँ आएको थियो । सोही रकम वितरणमा काँग्रेस र एमालेका जनप्रतिनिधिहरुबीच विवाद भएको हो । ७ वडा रहेको पालिकामा करिब १४ सयले विपन्न भन्दै फाराम भरेका थिए ।
यसअघि निर्वाचित भएका एमालेका निवर्तमान वडाध्यक्षले पठाएको विपन्नको नाम अहिले काँग्रेसबाट निर्वाचित भएका वडाध्यक्षले काटेर पठाएको एक पक्षको आरोप छ भने अर्को पक्षले पहिला गैर विपन्न व्यक्तिहरूको नाम पठाएको अर्को पक्षले आरोप लगाएपछि काँग्रेस एमालेका कार्यकर्ताबीच कुटाकुट भएको हो ।
वडा नम्बर ५ का अध्यक्ष लक्ष्मण चौधरीले फाराम नभरेकाहरूको पनि नामावली समावेश गरी रकमका लागि पालिकामा सिफारिस पठाएको आरोप लागेको छ । उक्त वडाबाट मात्र अति विपन्न भन्दै ४ सय १८ जनाले फाराम भरेका थिए ।
सुरुमा सबैको नामावली वडाध्यक्षले पालिकामा पठाएका थिए । तर पालिकाले १ सय ६ जनाको नाम पठाउने भनेपछि वडाध्यक्षले सोही अनुरूप नाम पठाएका थिए । ती सबैको नाम उपर दाबी विरोध गर्न पालिकाले सूचना जारी गरेको थियो । सोही सूचनाअनुसार वडाध्यक्ष चौधरीले वडाबाट पठाएको नामावलीलाई गाउँपालिकाले थपघट गर्दै नामावली निकालेको भन्दै ३२ जनाको सूची हटाउन निवेदन दिएपछि विवाद सुरु भएको हो ।
विवादपछि १२ जना गाउँपालिका उपाध्यक्ष बासमती हरिजनले आफ्ना मान्छे राख्ने र बाँकी २० जना वडाध्यक्षलाई आफ्ना मान्छे राख्न दिने सहमति भएको थियो । सहमतिमा वडाध्यक्षलाई दाबी विरोध फिर्ता लिनुपर्ने बताए पनि उनले फिर्ता नलिएपछि विवादले उग्र रूप लिएको हो । उपाध्यक्ष हरिजन एमालेकी हुन भने वडाध्यक्ष चौधरी काँग्रेसका हुन् ।
विवादले उग्ररुप लिँदै काँग्रेस र एमालेका कार्यकर्ताबीच कुटाकुट हुँदा १८ जना घाइते भएका हुन् । घाइते हुनेमा काँग्रेसका ८ र एमालेका १० जना रहेको प्रहरीले जनाएको छ ।
दुवै पक्षले इँटा र ढुङ्गा प्रहार गर्दा उनीहरू घाइते भएका हुन् । घाइते १८ मध्ये ६ जनाको लुम्बिनी सिटी अस्पताल बुटवलमा उपचार भइरहेको जिल्ला प्रहरी कार्यालयका उपरीक्षक ऋषिराम कँडेलले जानकारी दिए ।
टाउकोमा चोट लागेका उनीहरूको अवस्था खतरामुक्त रहेको प्रहरीले जनाएको छ । संघीय सरकारबाट आएको रकम वितरणमा विवाद हुँदा सरावल गाउँपालिकाकै वडा नं। २ को कार्यालय चार दिनदेखि बन्द भएको गाउँपालिका अध्यक्ष सुखाडी प्रसाद चौधरीले बताए ।
प्रकाशित मिति: शनिबार, असार ३२, २०७९
