काठमाडौँ । गए रातिदेखि परेको अविरल वर्षाका कारण चन्द्रागिरि डाँडोमा हिमपात भएको छ ।राजधानीको पर्यटकीय क्षेत्रको रुपमा रहेको उक्त स्थानमा आज बिहानैदेखि हिमपात भएको हो ।
चन्द्रागिरि रिसोर्ट, भालेश्वर मन्दिर, केवलकार स्टेसनलगायत क्षेत्रमा हिउँले ढाकेको चन्द्रागिरि हिल्स लिमिटेडका महाप्रबन्धक अभिषेकविक्रम शाहले बताए ।गत पुसको दोस्रो साता उक्त स्थानमा हिउँ परेकामा आज दोस्रो पटक बाक्लो हिमपात भएको हो ।
पहिलो पटक हिउँ पर्दा चन्द्रागिरिमा हजारौँ युवायुवती हिउँ खेल्न पुगेका थिए । पश्चिमी न्यून चापीय प्रणाली देशभर सक्रिय भएकाले अहिले हिमाली र उच्च पहाडी भेगमा हिमपात हुनाका साथै अन्य धेरै स्थानमा वर्षा भइरहेको छ ।
यस्तै हिउँ परेका कारण त्रिभुवन राजपथसमेत अवरुद्ध हुन पुगेको छ । गएरातिदेखि परेको वर्षाका कारण उक्त राजपथअन्तर्गतको सिमभन्ज्याङमा बाक्लो हिउँ पर्दा बाटो अवरुद्ध भएको हो । हिमपातका कारण काठमाडौँबाट हेटौँडातर्फ प्रस्थान गर्ने सवारीसाधन बाटोमा रोकिएको प्रहरीले जनाएको छ ।
प्रकाशित मिति: शुक्रबार, माघ २१, २०७८
-1732776560.jpg)
