लन्डन । काबुल विमानस्थल नजिकै भएको अव्यवस्थित भीड र भाग दौडका कारण कम्तीमा सात जना अफगान नागरिकको मृत्यु भएको बेलायती रक्षा मन्त्रालयले जनाएको छ ।
हजारौँ मानिसले देश छोडेर भाग्ने प्रयास गर्दा विमानस्थल वरपर ठुलो भीड लाग्ने गरेको र अव्यवस्थाबिच सात अफगान नागरिकले ज्यान गुमाएका छन् ।
मन्त्रालयका प्रवक्ताले भने, ‘काबुलमा भीडमा सात अफगान नागरिकहरूको ज्यान गएको छ । हामी पीडित परिवारप्रति हार्दिक समवेदना प्रकट गर्दछौँ ।’
संयुक्त राज्य अमेरिका र यसका सहयोगी राष्ट्रहरूले तालिबानले सत्ता कब्जामा लिएदेखि हप्तामा उद्धार उडानमा जान प्रयास गरिरहेका मानिसहरूको ठुलो सङ्ख्याको सामना गर्न सङ्घर्ष गरिरहेका छन् ।
प्रवक्ताले भने, ‘काबुल, काबुल विमानस्थल र वरपरको अवस्था अत्यन्तै चुनौतीपूर्ण रहेको छ तर यथासम्भव मानिसहरूको सुरक्षित व्यवस्थापन गर्न हामीले सक्दो प्रयास गरिरहेका छौँ ।’
बेलायती रक्षा मन्त्री बेन वालेसले बेलायत पत्रिका मेलसँग भने, ‘अगस्त ३१ को अमेरिकी समय सीमा अगाडि ‘कुनै पनि राष्ट्रले सबैलाई पूर्णतया बाहिर निकाल्न सक्दैन’।
उनले थपे, ‘सायद अमेरिकीहरूलाई लामो समयसम्म रहने अनुमति दिइनेछ र उनीहरूले त्यसो गरेमा उनीहरूलाई हाम्रो पूर्ण समर्थन हुनेछ ।’
प्रकाशित मिति: सोमबार, भदौ ७, २०७८
