गोरखा । गोरखा अस्पतालमा पर्याप्त आइसोलेसन शय्या नहुँदा कोरोना सङ्क्रमितलाई अस्पताल बाहिर बेन्चमा राखेर उपचार गर्नुपर्ने बाध्यता बनेको छ । पछिल्लो समय सङ्क्रमण बृद्धिभएपछि बिरामीहरूलाई अस्पतालको बाहिर अक्सिजन दिएर राख्नुपरेको हो ।
छ शय्या मात्र आइसोलेशन रहेको अस्पतालका सूचना अधिकारी कृष्ण ढकालले जानकारी दिए । ‘दुई श्ययामा महिला र चार शय्यामा पुरुष सङ्क्रमित छन्, उनीहरुसबैलाई अक्सिजन दिनुपर्छ । थप बिरामीलाई भर्ना गर्नसक्ने अवस्था छैन ।’
ती बिरामीमा ज्वरो आउने र अक्सिजनको मात्रा घटेको पाइएको छ । अस्पतालमा राखेर उपचार गर्न सक्ने अवस्था नभएपछि अस्पतालले अक्सिजन दिनु नपर्ने बिरामीहरूलाई भने होम आइसोलेसनमा बस्न भन्दै फिर्ता पठाउने गरेको छ ।
दोस्रो चरणको सङ्क्रमण सुरु भएपछि अहिलेसम्म जिल्ला अस्पतालमा २४ सङ्क्रमित उपचार गराउन आएकोमा छ जना बाहिरी जिल्लाबाट उपचारका लागि रिफर गरिएको छ । यसै गरी १२ जना उपचारपछि निको भएर घर फर्किएको उनले जानकारी दिए । आज बिहान थप पाँच जना बिरामीलाई अस्पताल भर्ना गर्नुपर्ने भएपछि अस्पताल बाहिर नै राखेर सङ्क्रमितको उपचार थालिएको उनको भनाइ छ । जिल्ला अस्पतालमा बाहेक आइसोलेसन शय्या निर्माण गरिएको छैन ।
आइसोलेसन शय्या नहुँदा उपचारकालागि सम्भव भएका बिरामीलाई समेत अन्यत्र रिफर गर्नुपर्ने बाध्यता रहेको अस्पतालले जनाएको छ । अस्पतालमा आइसोलेसनको अभाव भएपछि अस्पतालको नयाँ बन्दै गरेको भवनमा तत्कालका लागि ३० शय्याको आइशोलेसन निर्माणको प्रयास भइरहेको सूचना अधिकारी ढकालले जानकारी दिए । अस्पतालको ओपिडी कक्ष नजिकै नयाँ भवन बन्दै गरेको छ । ‘भवन निर्माणको सबै काम त सम्पन्न भएको छैन’, उनले भने, ‘तत्कालकालागि एउटा ब्लगमा ३० शय्यासम्मको आइसोलेशन निर्माण गर्न सकिन्छ कि भनेर पहलगरिरहेका छौँ ।’ जिल्ला अस्पताल भित्र आइतबारसम्ममा सक्रिय सङ्क्रमितको सङ्ख्या ३५० जना पुगेको स्वास्थ्य कार्यकालका महामारी फोकल पर्सन नारायणबाबु अर्यालले जानकारी दिए ।
प्रकाशित मिति: सोमबार, वैशाख २७, २०७८
-1732776560.jpg)
