लमजुङ । लमजुङमा कोरोना सङ्क्रमणको उच्च जोखिम कायम रहेपनि मास्क नलगाउने र लगाएको मास्क जथाभावी फाल्नेको सङ्ख्या वृद्धि हुँदा थप जोखिम बढ्न थालेको छ । सरकारले कोभिड–(१९ नियन्त्रणका लागि मास्क लगाउन आग्रह गरेपनि सहरबजारदेखिगाउँघरसम्मै मास्क नलगाउने र लगाएकाहरूले समेत जथाभावी फाल्ने गर्दा जिल्लामा उच्च जोखिम बढ्न थालेको हो ।
चाडपर्व नजिकिएसँगै किनमेलका लागि सहरबजारका पसलमा र विभिन्न कार्यालयहरूमा आउने सेवाग्राही तथा सर्वसाधारणको भीड बढिरहेको र कोरोनाको जोखिम बढिरहेको बेला अधिकांशले मास्क बिना हिँडडुल गर्ने र प्रयोग गरेकाहरूले समेत जथाभावी फाल्ने गर्दा स्थानीय बासिन्दा त्रस्त भएको बेँसीसहर नगरपालिका ७ का बिपिन श्रेष्ठले बताए ।
प्रयोग गरी फालिएको मास्कमा थुक, ¥याल र सिँगानको छिटा रहेको हुनसक्ने र यसबाट अन्य ब्यक्तिलाई सङ्क्रमण हुनसक्ने चिकित्सकहरूको भनाइ छ ।कोभिड–१९ रोकथाम तथा नियन्त्रणमा जिल्लावासी नै जिम्मेवारी तथा सचेत रहनुपर्ने जिल्ला स्वास्थ्य कार्यालयका प्रमुख अमर दवाडीले बताए ।
प्रमुख जिल्ला अधिकारी कृष्णप्रसाद शर्माले भने, “प्रशासनले आम नागरिकलाई सचेत रहन, मास्क अनिवार्य प्रयोग गरेर, हिँड्न आग्रह गर्दै आइरहेको छ तर पनि प्रशासनको बेवास्ता र कोरोना सङ्क्रमणकै बेवास्ता गरेका कारण जिल्लामा थप जोखिम बढिरहेको छ ।” जतिसुकै सचेतनामूलक सूचना जारी गरेपनि कोरोना सङ्क्रमणबाट बच्न विभिन्न तरिका अपनाउन अनुरोध गरेपनि नागरिकहरूले लापर्बाही गरिरहेका छन् ।
जिल्लामा बिहीबार बिहानसम्म ११४ महिला र ३६० पुरुष गरी ४७४ जनामा कोरोना सङ्क्रमणको पुष्टि भएको थियो । यी मध्ये, ८६ महिला र २९६ पुरुष गरी ३८३ सङ्क्रमित निको भइसकेका छन् भने २८ महिला र ६४ पुरुष गरी ९२ जना जिल्लाको विभिन्न आइसोलेसनमा उपचाररत् रहेको जिल्ला प्रशासन कार्यालयले जनाएको छ ।
प्रकाशित मिति: शुक्रबार, असोज ३०, २०७७
-1732776560.jpg)
