काठमाडौँ। भरतपुर विमानस्थलमा दैनिक पाँच आन्तरिक उडान हुन थालेको छ। यात्रुको सङ्ख्या बढ्न थालेपछि उडान हुने जहाजको सङ्ख्या पनि थपिएको छ। भरतपुर नागरिक उड्डयन कार्यालयका प्रमुख योगेन्द्र कुँवरले आजदेखि दुई एयरलायन्सले दैनिक ६ उडानको तालिका बनाएको बताए।
उनले भने, “बुद्ध र यती एयरलाइन्सले आजदेखि तीन/तीन उडान भर्ने तालिका बनाएका छन्, यात्रुको सङ्ख्या क्रमशः बढ्दो अवस्थामा छ।” यती एयरलायन्सले दुई मात्र उडान भर्ने जनाएको छ। भदौ १ गतेदेखि आन्तरिक र बाह्य उडान शुरु भएको थियो। शुरुमा दैनिक चार उडान भएको थियो। “यात्रुको चाप बढ्नु राम्रो संकेत हो,” कुँवरले भने, “अहिलेको स्थिति यथावत रहिरहे दशैँसम्म पुरानै अवस्थामा आन्तरिक उडान फर्कने छ।”
बुद्ध एयर भरतपुर स्टेशन म्यानेजर भक्तबहादुर बस्नेतले यात्रुको चाप बढेपछि बुधबारदेखि एउटा उडान थपिएको बताए। “जहाजमा यात्रुको सङ्ख्या भरिभराउ नै छ,” उनले भने, “कोभिडसम्बन्धी सबै सावधानी अपनाएर उडान भरिरहेका छौँ।” बुद्धको भरतपुर पोखरा उडान भने तत्काल सञ्चालनमा नआउने उनले जानकारी दिए।
यती एयर भरतपुरका स्टेसन इञ्चार्ज अनुप ढकालले जहाज ३० सिट क्षमताको भए पनि स्वास्थ्य सुरक्षा मापदण्डको हिसाबले २० देखि २५ जनामात्रै उडाउने गरेको बताए। काठमाडौंबाट आउनेभन्दा पनि जाने यात्रुको सङ्ख्या बढिरहेको उनले बताए।
“उडान हामीले सोचेभन्दा राम्रो छ,” उनले भने, “पारिवारिक सदस्यलाई मात्र सँगै बस्न दिएका छौँ, अन्यलाई छुट्टा-छुट्टै बस्ने व्यवस्था गरेका छौं।” ६ महिनासम्म उडान नहुँदा चितवनको पर्यटन क्षेत्र बढी प्रभावित भएको छ। सामान्य अवस्थामा दैनिक १३ वटासम्म उडान हुने गरेको थियो।
प्रकाशित मिति: बिहीबार, असोज १५, २०७७
