काठमाडाैं । काेराेना भाइरसकाे संक्रमणका कारण माेरङ, नवलपरासी र नवलपुरका गरी थप ३ जनाकाे मृत्यु भएकाे छ ।
चितवन मेडिकल कलेजमा उपचारका क्रममा १ कोरोना संक्रमितको मृत्यु भएको छ । मृत्यु हुनेमा नवलपरासीकाे गैँडाकोट नगरपालिका–९ बस्ने ६२ वर्षीया वृद्धा रहेको अस्पतालले जनाएको छ।
ज्वरो, खोकी र श्वासप्रश्वासमा समस्या आई भदौ १५ गते अस्पताल भर्ना भएकी उनमा १७ गते कोरोना संक्रमण पुष्टि भएको थियो ।
संक्रमण देखिएसँगै कोभिड सघन उपचार कक्षमा उपचारका क्रममा उनको आइतबार राति साढे ११ बजे मृत्यु भएको अस्पतालका निर्देशक डा दयाराम लम्सालले जानकारी दिए ।
यसैगरी मोरङको धनपालथान गाउँपालिका- ६ का १ पुरुषको पनि आइतबार राति ८:४५ बजे धरानस्थित बिपी काेइराला स्वास्थ्य विज्ञान प्रतिष्ठानमा मृत्यु भएको छ ।
प्रतिष्ठानका प्रवक्ता डा. निदेश सापकोटाका अनुसार ४० वर्षीय ती पुरुषमा गत २६ गते कोरोना संक्रमण पुष्टि भएको थियो।
प्रतिष्ठानको अब्जर्वेसन वार्डमा भर्ना भएका उनको प्रतिष्ठानकै प्रयोगशालमा परीक्षण गर्दा रिपोर्ट पोजेटिभ देखिएको थियो ।
काेराेना संक्रमणबाहेक ती पुरुषमा कुनै दीर्घराेग नरहेकाे अस्पतालले जनाएकाे छ ।
यसैगरी नवलपुरकाे मध्यविन्दु–१२,का ६० वर्षीय पुरुषको पनि उपचारको क्रममा लुम्बिनी अस्पतालमा मृत्यु भएको छ ।
निमोनिया र श्वासप्रश्वाससम्बन्धी समस्याले ग्रस्त उनको उपचारको क्रममा भदौ २६ गते दिउँसो मृत्यु भएको हो । रुपन्देहीको लुम्बिनी अस्पतालमा उपचाररत ती पुरुषको स्वाब जाँच गर्दा संक्रमण पुष्टि भएको थियो ।
प्रकाशित मिति: सोमबार, भदौ २९, २०७७
-1732776560.jpg)
