काठमाडौं । नेपालमा बुधबार थप १ हजार १ सय २० जनामा काेराेना भाइरसकाे संक्रमण पुष्टि भएकाे छ ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गाैतमका अनुसार पछिल्लाे २४ घन्टामा गरिएकाे परीक्षणमा साे संख्यामा संक्रमित थपिएकाे जानकारी दिए ।
काठमाडौं उपत्यकामा मात्रै बुधबार थप ३ सय ८८ जनामा कोरोना संक्रमण पुष्टि भएको छ।
गौतमका अनुसार पछिल्लो २४ घन्टामा काठमाडौंका ३ सय ५०, ललितपुरका २९ जना र भक्तपुरमा ९ जना संक्रमित भएका हुन् ।
योसहित देशमा संक्रमितको कुल संख्या ४१ हजार ६ सय ४९ पुगेको छ भने सक्रिय संक्रमितकाे संख्या १८ हजार १ सय ८ छ ।
यसैगरी पछिल्लो २४ घण्टामा १ हजार १ सय १२ जना कोरोना जितेर डिस्चार्ज भएका छन् । योसँगै कुल डिस्चार्ज हुनेको संख्या २३ हजार २ सय ९० पुगेको छ ।
यसैगरी नेपालमा पछिल्लाे २४ घण्टामा थप १२ जनाकाे मृत्यु भएको छ। योसँगै कोरोनाका कारण मृत्यु हुने संक्रमितकाे संख्या २ सय ५१ पुगेको छ ।
पछिल्लो पटक मृत्यु पुष्टि हुनेमा ६ महिला र ६ जना पुरुष छन् । चितवनका ५५ र १८ वर्षीया महिला, ६५ वर्षीय पुरुष, काठमाडौंका ८९ वर्षीया महिला, ७० र ७५ वर्षीय पुरुषको मृत्यु भएको छ ।
यसैगरी ललितपुरमा ७०, तनहुँमा २० र कपिलवस्तुमा ६० वर्षीया महिलाको मृत्यु भएको छ भने बारामा ९७, भक्तपुरमा ४० र धादिङमा ४७ वर्षीय कोरोना संक्रमितको मृत्यु भएको छ ।
प्रकाशित मिति: बुधबार, भदौ १७, २०७७
-1732776560.jpg)
