कालिकोट। कालिकोटको तिलागुफा नगरपालिका–१ नाग्ममा गएकाे पहिरोमा पुरिएर एकै परिवारका ४ जनासहित १० जनाको मृत्यु भएको छ ।
पहिरोमा पुरिएर पसल गरी बस्ने ३६ वर्षीय प्रयाग शाही, उनकी ८ वर्षीया छोरी हिमा शाही, ५ वर्षीय छोरा निराजन शाही र २ महिनाको छोराको मृत्यु भएको प्रहरीले जनाएकाे छ।
यस्तै पहिरोमा परेर तिलागुफा–१ का ३० वर्षीय टेकबहादुर दमाई, उनकी श्रीमती २५ वर्षीया छैली र ६ वर्षीय छोरा गजेन्द्रको मृत्यु भएको छ । तिलागुफा १ कै ३५ वर्षीय मनवीर कटुवालको पनि पहिरोमा पुरिएर मृत्यु भएको छ।
सुर्खेतको वीरेन्द्रनगर नगरपालिका घर भएका ४८ वर्षीया आइती खड्का र उनका कामदार २२ वर्षीय अमृत थापाको पनि सोही पहिरोमा परी ज्यान गएको छ ।
नाग्म बजारको पछाडिपट्टिको भिरालो जमिन आइतबार बिहान भासिएर पहिरो जाँदा घरभित्रै रहेकाहरू पुरिएका हुन् । पहिरोले लली नेपाली, मन्दिर कटुवाल, धनपति विक र वीर भेरिकारका घर भत्किँदा पुरिएकामध्ये १० जनाको शव फेला परेको हो ।
पहिराेमा परी घाइते भएका २ जनालाई उपचारका लागि कर्णाली स्वास्थ्य विज्ञान प्रतिष्ठान जुम्ला लगिएको छ ।
प्रकाशित मिति: सोमबार, भदौ १५, २०७७
