विराटनगर । मोरङको बेलबारी नगरपालिकामा २ पक्षबीच झडप हुँदा १ जनाको मृत्यु भएकाे छ भने ४ जना घाइते भएका छन् ।
प्रहरीका अनुसार आज अपराह्न १ बजे बेलबारी –५ कसेनी लोहन्द्रा पुलमा सोही स्थान बस्ने ३२ वर्षीय जितेन चौधरी, २५ वर्षीय दिनेश श्रेष्ठ र ३२ वर्षीय सन्तोष मगर तथा सोही स्थान बस्ने ४२ वर्षीय सईकुमार राई, ३५ वर्षीय समुद्र राई र १६ वर्षीय गौरव राईलगायतबीच सामान्य वादविवाद हुँदा खुकुरी प्रहारबाट घाइते भएका ४० वर्षीय चन्द्रकुमार राईको उपचारका क्रममा मृत्यु भएको हाे ।
खुकुरी प्रहारबाट घाइते उनको विराट शिक्षण अस्पतालमा उपचारका क्रममा मृत्यु भएको जिल्ला प्रहरी कार्यालय मोरङका प्रवक्ता प्रहरी नायब उपरीक्षक मानबहादुर राईले बताए ।
घटनामा घाइते भएका सईकुमार, समुद्र र गौरव राईको सोही अस्पतालमा उपचार भइरहेको छ । खुकुरी प्रहार गर्ने समूहका जितेन समेत घाइते भएकामा विराट नर्सिङ होम विराटनगरमा उपचार भइरहेको प्रहरीले जनाएको छ ।
झगडामा संलग्न अन्य ३ जना फरार रहेकामा खोजतलास भइरहेको प्रहरीले जनाएकाे छ ।
प्रकाशित मिति: शुक्रबार, भदौ १२, २०७७
