लमजुङ। बेंसीसहर नगरपालिका-९, साम्दी थापा गाउँमा आइतबार बिहान मानिससँगको भिडन्तमा एक चितुवा मारिएको छ।
बिहान ६ बजेतिर गाउँ पसेर बालकमाथि आक्रमण गर्न खोजेपछि ६३ वर्षीय हरिबहादुर थापाले हँसिया प्रहार गर्दा चितुवा मारिएको हो।
थापा र चितुवाबीच केहीबेर घम्साघम्सी परेको थियो । चितुवाकाे आक्रमणमा परेर थापा घाइते भएको प्रमुख जिल्ला अधिकारी कृष्णप्रसाद शर्माले जानकारी दिए ।
अहिले घाइतेको प्रारम्भिक उपचार लमजुङ सामुदायिक अस्पतालमा भइरहेको बताइएको छ।
मृत चितुवा डिभिजन वन कार्यालय लमजुङलाई बुझाइएको छ । ‘वन ऐनअनुरुप उहाँहरूले व्यवस्थापन गर्नु हुनेछ’, प्रजिअ शर्माले भने ।
प्रकाशित मिति: आइतबार, भदौ ७, २०७७
