काठमाडौँ । गायक तथा सङ्गीतकार सन्तोष खरेलको नयाँ सिर्जना ‘हजुरबाले चोया काडे डोको बुन्नलाई, तिम्रो–मेरो लगन जुर्यो घरबार हुनलाई’ बोलको गीत युटुब तथा टिकटकमा लोकप्रिय हुन थालेको छ ।
एमबि क्रिएसन च्यानलमार्फत शुक्रबारदेखि युटुबमा म्युजिक भिडियोका रूपमा सार्वजनिक गरिएको सो गीतको एक महिनाअघि नै लिरिकल भिडियो सार्वजनिक गरिएको थियो । आकर्षक डान्सिङ नम्बरका रूपमा तयार पारिएको सो गीतको सयभन्दा टिकटक भिडियो सार्वजनिक भइसकेका छन् भने युटुबमा अपलोड गरेको पाँच घण्टामै करिब दुई हजारले हेरिसकेका छन् ।
विशेषगरी क्वारेन्टाइन तथा होम–क्वारेन्टाइनमा बसेका कोरोना त्रासबाट प्रभावित व्यक्तिहरूलाई मनोरञ्जन प्रदान गरी आत्मबल बढाउने उद्देश्यले आफूहरूले सो गीतमा लगानी गरेको गायक तथा सङ्गीतकार खरेलले बताए । सन्तोष खरेलको शब्द तथा सङ्गीत रहेको प्रस्तुत गीतमा सन्तोष खरेल तथा मेलिना राईको स्वर रहेको छ ।
मनोज बिष्टले निर्देशन गरेको सो गीतको म्युजिक भिडियोमा अनुप श्रेष्ठ, अनिता गिरी, शिशिर तिमल्सिना, रायन बिष्ट, आशिष बिष्ट, देवंसी आरएल शाहलगायत कलाकारको अभिनय तथा नृत्य प्रस्तुति रहेको छ ।
यो भन्दाअघि खरेलका अनन्त यात्रा, एक नजर, तिम्रो साथ, प्रेमी पागलपन, यो मन गरी पाँचवटा गीति–एल्बम सार्वजनिक भइसकेका छन् । उनले गाएका ‘छन् तिम्रा लागि रूने धेरै छन्, नेपाल आमा, देश बचाउन, शान्तिको फूल फुल्छ, टिपेर सजाउँदा फूलहरू’ लगायत गीत÷गजल लोकप्रिय छन् ।
सार्वजनिक गरिएको गीतको शब्द यस्तो रहेको छ –
हजुरबाले चोया काडे डोको बुन्नलाई ।
तिम्रो मेरो लगन जुर्यो घरबार हुनलाई ।
सिन्का खोजी गुँड लाउन थाल्यो चराले,
बौलाउने बनाउँछ कि तिम्रो मायाले ।
...
सँगै घुमौँला, सँगै रमाउँला
सुख–दुःख जिन्दगी यो सँगै बिताउँला ।
...
खेत भरी धान झुल्यो बारीभरि कोदो ।
तिम्रो लागि दुनियाँमा केटो मै हो सोझो ।
बगैंचामा फूल फूल्यो भमराको ताँती ।
चञ्चल मनले खोज्न थाल्यो एउटा जीवनसाथी ।
...
सिरिसिरि हावा मिठो वर–पीपलको छाया ।
एकबारको जुनी हाम्रो लगाऊँ चोखो माया ।
ठेकीभरी दूध–दही गाग्रोभरी पानी ।
एका देशको मै हुँ राजा तिमी मेरी रानी ।
...
प्रकाशित मिति: शुक्रबार, साउन ३०, २०७७
-1733641946.jpg)
-1732776560.jpg)
