काठमाडौं । कालिकोटको महावै गाउँपालिका वडा नम्बर ३ नकु भन्ने स्थानमा गएकाे पहिरोमा पुरिएर ६ जनाको मृत्यु भएको छ ।
गएराति १२ बजेतिर आएको पहिरोले वडा सदस्य रजबहादुर विष्टको घर पुरिँदा ६ जनाको मृत्यु भएको हो ।
पहिरोमा पुरिएर वडा सदस्य बिष्टका छोराछाेरी १३ वर्षीय पुष्प, ११ वर्षीय प्रविन, १८ वर्षीया सविना र १५ वर्षीया आशा विष्ट तथा उनका दाजु डिलबहादुर विष्टका छोरीहरु १९ वर्षीया शान्ति र १० वर्षीया रेखाको मृत्यु भएको जिल्ला प्रहरी कार्यालयले जनाएकाे छ ।
तल्लो तलामा सुतेका वडा सदस्य बिष्ट र उनकी पत्नी भने सकुशल छन् । उनीहरुलाई सामान्य चोट लागेकाे छ।
जिल्ला प्रहरी कार्यालय कालिकोटले पहिरोमा परी ६ जनाको मृत्यु भएको पुष्टि गरेको छ ।
हाल मृतक ६ जना बालबालिकाको शव बाहिर निकालिसकिएको प्रहरीले जनाएकाे छ ।
प्रकाशित मिति: शुक्रबार, साउन ३०, २०७७
