काठमाडाैं । सूचना तथा प्रसारण विभागले पत्रकारहरूको नयाँ प्रेस प्रतिनिधि प्रमाणपत्र जारी र नवीकरणका काम तत्कालका लागि स्थगित गरेको छ ।
अनलाइन सञ्चारमाध्यमतर्फ नयाँ र पुन: दर्ता तथा नवीकरण र प्रसारणतर्फको सेवा प्रवाह गर्दा व्यक्ति स्वयम् विभागमा उपस्थित हुनुपर्ने भएकोले साे सेवा अनलाइन, भर्चुअल वा विद्युतीय माध्यमबाट सेवा प्रवाह गर्न तत्काल सम्भव नहुनाले सेवा स्थगित गर्नुपरेको शाखा अधिकृत बसन्तबहादुर खत्रीले बताए ।
तर, श्रमजीवी पत्रकारले प्रेस रजिष्ट्रार समक्ष दिने उजुरी र सोसम्बन्धी काम भने निरन्तर हुने जानकारी दिइएको छ।
‘साउन २६ को मन्त्रिपरिषद्को निर्णयअनुसार सरकारको अर्को निर्णय नभए सम्मका लागि हाललाई उपरोक्त सेवा प्रवाह स्थगित गरिएको छ,’ सूचनामा भनिएको छ, ‘सेवाग्राहीमा पर्न गएको असुविधाप्रति विभाग क्षमाप्रार्थी छ।’
प्रकाशित मिति: बुधबार, साउन २८, २०७७
