निर्मला पन्तको बलात्कारपछि हत्या प्रकरणबारे अनुसन्धानमा खटिएका तत्कालीन कञ्चनपुरका प्रहरी प्रमुख एसपी डिल्लीराज विष्टसहित ८ जनाले सफाइ पाएका छन्।
जिल्ला अदालत कञ्चनपुरका न्यायाधीश गोपालप्रसाद बास्तोलाको इजलासले बिहीबार सार्वजनिक न्यायविरुद्धको कसूर र यातनासम्बन्धी कसूरमा तत्कालीन एसपी विष्टसहित अनुसन्धानमा खटिएका ८ जना प्रहरीलाई सफाइ दिएको हो ।
निर्मलाकी आमा दुर्गादेवी र दिलीपसिंह विष्टका दाजु खडकसिंह विष्टले प्रमाण नष्ट गरेको र दिलीपलाई यातना दिएको भन्दै एसपी विष्ट र डिएसपी अंगुर जिसी, डिएसपी ज्ञानबहादुर सेठी, इन्स्पेक्टर एकेन्द्र खड्का, इन्स्पेक्टर जगदीश भट्ट, सईहरु हरिसिंह धामी, रामसिंह धामी र प्रहरी जवान चाँदनीविरुद्ध जाहेरी दिएका थिए ।
जिल्ला अदालतको यो फैसलापछि निलम्बनमा परेका प्रहरी अधिकारी सेवामा फर्कने बाटो खुला भएको छ ।
एसपी विष्ट र इन्स्पेक्टर जगदीश भट्टलाई भने भविष्यमा सरकारी सेवाका लागि अयोग्य हुने गरी प्रहरी सेवाबाट हटाइएकाले उनीहरु सेवामा फर्कन पाउने छैनन् ।
अदालतका अनुसार एसपी विष्ट, डिएसपीद्वय सेठी र जिसी, प्रहरी निरीक्षकद्वय खड्का र भट्ट, सईद्वय हरसिंह धामी र रामसिंह धामी तथा जवान सावदले कसुरदारलाई बचाउने नियतले प्रमाण दबाएको (दफा ९३) अनुसारको मुद्दामा सफाइ पाएका हुन् ।
यस्तै, यातना दिएको (दफा १६७) अनुसारको मुद्दामा एसपी विष्ट, डिएसपीद्वय सेठी र अंगुर जि.सी तथा प्रहरी निरीक्षक खड्काले सफाइ पाएको अदालतले जनाएकाे छ ।
२०७५ साउन १० गते पन्तको बलात्कारपछि हत्या भएको थियो ।
अदालतले प्रहरीलाई सफाइ दिएपछि निर्मलाको बलात्कार हत्या आरोपमा यसअघि पक्राउ परेर साधारण तारेखमा रिहा भएका दिलीपसिंह बिष्टलाई पुन पक्राउ गर्ने बाटो खुल्ला भएको छ ।
प्रकाशित मिति: बिहीबार, साउन १५, २०७७
-1732776560.jpg)
