स्याङ्जा । भारत हुँदै नेपाल पसेको सलह कीरा स्याङ्जामा पनि देखा परेको छ। जिल्लाको कालीगण्डकी गाउँपालिकामा यो कीरा देखिएपछि किसान चिन्तित बनेका छन्।
गाउँपालिका विभिन्न ठाउँमा सलह देखिएपछि गाउँपालिकाले सलह कीरा मार्नेलाई प्रतिकिलो १ सय रूपैयाँ दिने निर्णय गरेको गाउँपालिका अध्यक्ष खिमबहादुर थापाले बताए।
अध्यक्ष थापाले किसानले लगाएको अन्नबाली जोगाउन यस्तो निर्णय गरिएको जानकारी दिए।
उनले भने, 'सलह कीरा छिट्टै नियन्त्रण गर्न नसके यसले अन्नबाली सखाप पारेर खाद्यान्नको समस्या हुनसक्ने भएकाले किसानलाई जागरुक बनाउन सलह कीरा मार्ने किसानलाई पैसा दिने निर्णय गरेका हौँ।'
साँझ गाउँपालिकाको आलमदेवी, बाँसटारी, गुरुङ्दी, सटुका, खोरबारी, छापलगायतका ठाँउमा सलह कीरा देखिएको गाउँपालिकाले जनाएको छ।
स्थानीय बासिन्दाले खेती जोगाउनका लागि आगो बाल्नुका साथै थाल ठटाएर सलह धपाइरहेको स्थानीय विष्णु न्यौपानेले बताए।
यसैगरी हरिनास गाउँपालिकाको चित्रेमा पनि सलह कीरा देखिएको गाउँपालिका उपाध्यक्ष झनमाया पराजुलीले जानकारी दिइन्।
सलह कीरा जिल्लामा प्रवेश गरेपछि गल्याङ नगरपालिकाका किसानलाई सचेत गराइएको नगरपालिकाका पशु सेवा शाखाका अधिकृत सुशील अर्यालले बताए।
किसानलाई धानको ब्याड र नर्सरी गरेर राखिएका बिरुवामा झुल टाँगेर राख्न भनेको अर्यालको भनाइ छ। खेतबारीमा सलह कीरा देखिएपछि स्थानीयवासी यतिबेला आगो बाल्नुका साथै ठूलो आवाज निकालेर भाँडाकुँडा ठटाएर सलह कीरा धपाउन जुटेका छन्।
लमजुङ : सलह कीरा लमजुङमा पनि प्रवेश गरेको छ।जिल्लाको सुन्दरबजार नगरपालिका–६ फेदिकुनामा आइतबार सलह कीरा देखिएको हो।
स्थानीयले सलह कीरा प्रवेश गरेको जानकारी दिएपछि कृषि ज्ञानकेन्द्र कार्यालय लमजुङबाट कार्यालय प्रमुख रोहिणीराज घिमिरे, अर्थविज्ञ मदन रेग्मीलगायतका टोली अनुसन्धानका लागि पुगेको छ। कृषि ज्ञान केन्द्र लमजुङका प्रमुख घिमिरेले भने, 'सलह कीराजस्तै देखिएको छ तर ठूलो समूहमा यो कीरा आएको छैन, सलह कीराको एउटा प्रजाति भएको देखिन्छ यहाँ जम्मा १०/१२ वटा मात्र फेला परेको छ।'
उनका अनुसार सलह कीरा भएको आशङ्का भए पनि पुष्टि भइसकेको छैन ।
कैलाली : कृषि विज्ञले पश्चिम नेपालमा सलह कीराको यात्रा हुनसक्ने पूर्वअनुमान गरेपछि धनगढी उपमहानगरपालिकाले आइतबार यहाँ १९ वटै वडाका वडाध्यक्ष र कृषि शाखाका कर्मचारीसँग छलफल गरेको छ। सलह कीराको व्यवस्थापनको पूर्वतयारीका लागि स्थानीयस्तरमा कसरी क्षति घटाउन सकिन्छ भनेर छलफल गरिएको बताइएको छ।
सलह कीराको सम्भाव्य जोखिम र त्यसको व्यवस्थापनका बारेमा छलफल गरिएको नगरप्रमुख नृपबहादुर वडले जानकारी दिए।
'जोखिम घटाउनका लागि स्थानीयस्तरमा सबै उपाय अपनाउन वडाध्यक्ष र कृषि प्राविधिकलाई निर्देशन दिएको छु', नगरप्रमुख वडले भने, 'क्षति घटाउनका लागि थाल ठटाउने, ड्रम बजाउने, स्पीकर बजाउने, धुँवा लगाउने, आगो बाल्नेलगायत सबै प्राकृतिक विधि अपनाउन किसानलाई आग्रह गरेका छौँ।'
प्रकाशित मिति: सोमबार, असार १५, २०७७
-1732776560.jpg)
