काठमाडौँ । पश्चिम रुकुमको सोती गाँउमा ६ जना युवकको ज्यान गएको घटनामा जिल्ला अदालतमा ३४ जना विरुद्ध मुद्दा दायर गरिएको छ ।
सरकारी वकिल कार्यालयले आइतबार जिल्ला अदालत रुकुम पश्चिममा विभिन्न ३ मुद्दामा जन्म कैदको माग गर्दै मुद्दा दर्ता गरेको हो ।
महान्यायाधीवक्ता कार्यालयका प्रवक्ता सञ्जीवराज रेग्मीले दिएको जानकारी अनुसार चौरजहारी-८ का वडाध्यक्ष डम्मरबहादुर मल्लसहित ३४ जनाले ६ जनाको क्रुरतापूर्वक हत्या गरेको, बाँकीलाई घाइते बनाएको र जातीय छुवाछूत गरेको भन्दै ३ वटा कसुरमा मुद्दा दर्ता भएको छ ।
मुद्दामा विपक्षी बनाइएका ३४ मध्ये २९ जनालाई प्रहरीले पक्राउ गरिसकेको छ भने ५ जना अझै फरार छन् ।
प्रहरी अनुसन्धानमा जेठ १० गते जाजरकोटका नवराज बिक र उनका ५ जना साथीलाई हत्या गरेर भेरी नदीमा फालेको देखिएको बताइएको छ । प्रहरीले गरेको अनुसन्धान र रायसहितको प्रतिवेदनका आधारमा सरकारी वकिल कार्यालयले मुद्दा दर्ता गरेको हो ।
प्रकाशित मिति: आइतबार, जेठ ३२, २०७७
-1732776560.jpg)
