काठमाडाैं । नारायणगढ-मुग्लिन सडकमा पहिरो रोक्ने काम अन्तिम चरणमा पुगेको छ। अहिलेसम्म ८४ प्रतिशत काम सकिएको नारायणगढ-मुग्लिन सडक आयोजनाले जनाएको छ।
लकडाउनले डेढ महिना रोकिएको काम पुनः तीव्र पारिएको हो । ‘अहिले धमाधम काम भइरहेको छ’, आयोजनाका सूचना अधिकारी इन्जिनियर शिव खनालले भने, ‘असार मसान्तसम्म काम सम्पन्न हुन्छ ।’
कामदारको समस्या भए पनि स्थानीयस्तरबाट व्यवस्थापन गरेर कामलाई निरन्तरता दिइएको उनले जानकारी दिए।
यो सडकखण्डको नौ ठाउँमा पहिरो रोक्नका लागि तार, रडलगायतका सामग्री प्रयोग गरिएको छ। सडकखण्डको १५ किलो, १८ किलो, घुमाउने, भालुढुङ्गा, जलवीरे, चारकिलो, टोपेखोला र कालिखोला नजिक पहिरो रोकथामको काम भइरहेको खनालले बताए।
नयाँ प्रविधिको उच्चतम प्रयोग गरेर ‘रकनेटिङ’, ‘बोल्टिङ’ र ‘बायो इन्जिनियरिङ’ प्रविधिबाट पहिरो रोकथामको काम भइरहेको उनको भनाइ छ। निर्माण कम्पनीले ३० हजार वर्गमिटर क्षेत्रमा पहिरो रोकथामको काम गर्ने छ ।
१४ करोड ९ लाख रुपैयाँकाे लागतमा पहिरो रोक्ने कामको जिम्मा बज्रगुरु हिमशिखर र न्यु टेक्निकल जेभीले पाएका हुन् । सामान्य अवस्थामा यो सडक हुँदै दैनिक १० हजार सवारी गुड्छन् । रासस
प्रकाशित मिति: शनिबार, जेठ २४, २०७७
