काठमाडौं । विश्वव्यापी महामारी रुप लिइरहेको कोरोना भाइरसको प्रभाव नेपाली राष्ट्रिय पत्रिकाहरुमा पनि परेको छ । कान्तिपुर दैनिकसँगै काठमाडौं पोस्ट, नेपाल साप्ताहिक, नारी र साप्ताहिक पनि केही दिन प्रकाशित नहुने कान्तिपुर पब्लिकेसनले जनाएको छ ।
कान्तिपुर दैनिकले विशेष प्रकाशकीयमार्फत छापा संस्करण स्थगित गरेको बताएको छ। यी सबैको अनलाइन संस्करण भने जारी रहने तथा कान्तिपुर टेलिभिजन र कान्तिपुर रेडियो भने यथावत प्रसारणमा रहने विशेष प्रकाशकीयमा उल्लेख छ ।
कोरोनाको जोखिमसँगै प्रिन्ट मिडियामा संकट आउन थालेको छ । यसअघि नै साप्ताहिकरुपमा प्रकाशित हुँदै आएको हिमाल खबर पत्रिका पनि बन्द भएको थियो ।
राजधानी बाहिरका विभिन्न जिल्लाबाट प्रकाशित हुँदै आएका पत्रिकाहरु पनि धमाधम बन्द हुन थालेका छन् ।
पत्रिकाबाट पनि कोभिड-१९ सर्न सक्ने जोखिमलाई मध्यनजर गरी दैनिक तथा साप्ताहिक पत्रपत्रिका बन्द गरिएको ती पत्रिकाका सम्पादक-प्रकाशकले बताएका छन् ।
प्रकाशित मिति: शुक्रबार, चैत १४, २०७६
