सोलुखुम्बू । उडिरहेको हेलिकप्टरबाट जस्तापाता खसेपछि स्थानीयवासी त्रसित बनेका छन् ।
सोलुदूधकुण्ड नगरपालिका-१ को लुङ्दिङ जंगलमा कैलाश एयरको हेलिकप्टरबाट गत हप्ता करिब ६ किलाे जस्तापातासहित २ रोल म्याट्रिक्स खसेपछि स्थानीयवासीमा त्रास र आक्रोश पैदा भएको हो।
टाक्सिन्दुका कुमार विश्कर्माले हेलिकप्टरबाट पटक-पटक सामग्री खस्ने गरेको भए पनि सम्बन्धित निकायले सुरक्षामा ध्यान नदिएको गुनासो गरे।
सोही गाउँका टेण्डी शेर्पाले सुरक्षित ढुवानीका लागि सम्बन्धित पक्षलाई बारम्बार आग्रह गरेको स्मरण गर्दै आफूहरुको सुझाव कार्यान्वयन नभएको बताए।
सोलुदूधकुण्ड नगरपालिका-१ टाक्सिन्दुडाँडाबाट खुम्बु क्षेत्रका लागि निर्माणलगायत दैनिक उपभोग्य वस्तु ढुवानी भइरहेको छ।
निर्माण सामग्रीसहित काठसमेत हेलिकप्टरमा झुण्ड्याएर ढुवानी हुँदा सुरक्षा जोखिम बढ्ने स्थानीयवासी बताउँछन्।
नेपाल नागरिक उड्डयन ऐन २०७३ मा विमानस्थलका अधिकारप्राप्त कर्मचारी वा सुरक्षाकर्मीबाट खनतलासी नगराई कुनै पनि यात्रु, मालसामान विमानस्थल निषेधित क्षेत्रमा प्रवेश गराउनु वा वायुयानबाट ओसारप्रसार गर्नु/गराउनु नहुने उल्लेख छ।
सोलुदूधकुण्ड नगरपालिकाका प्रमुख नाम्गेल जाङ्बु शेर्पाले उडान तथा अवतरणको विषय आफूहरुको क्षेत्राधिकारभित्र नभएको बताउँछन्।
खुम्बु पासाङल्हामु गाउँपालिकाका प्रवक्ता लाक्पाछिरी शेर्पाले गाउँपालिकामा सडकको पहुँच नपुगेकाले हेलिकप्टरबाट सामान ढुवानीको विकल्प नभएको बताए।
सामान ढुवानी गर्ने सम्बन्धित कम्पनीले ध्यान दिनुपर्ने उनको भनाइ छ।
जस्तापाता खसेको विषयमा छानबिन गर्न चालक गुन्जमान लामाको नेतृत्वमा गठित तीन सदस्यीय टोलीले टाक्सिन्दु पुगेर अवलोकन गरेको नागरिक उड्डयन प्राधिकरण लुक्लाका प्रमुख इमनाथ अधिकारीले बताए।
सोलुखुम्बूका प्रहरी प्रमुख प्रहरी नायब उपरीक्षक टेकुनन्द इवा लिम्बूले भने, सुरक्षा समितिको बैठकले पनि आवश्यक छलफलपछि निर्णय गर्छौं, अहिलेलाई ढुवानी बन्द गरिएको छ। रासस
प्रकाशित मिति: शुक्रबार, फागुन १६, २०७६
