कलैया । मोटरसाइकल दुर्घटनामा परी बारामा ३ जनाको मृत्यु भएको छ । लंगडाचोकबाट कुडवातर्फ जाँदै गरेको लु २१ प ६९६३ नम्बर मोटरसाइकलमा सवार पतरौता नगरपालिका–९ कलावंजरका ३५ वर्षीय मञ्जय ठाकुरको मोटरसाइकल दुर्घटनामा सोमबार मृत्यु भएको जिल्ला प्रहरी कार्यालयका प्रवक्ता गौतम मिश्रले जानकारी दिए ।
उनले लंगडाचोकबाट बाजोपटीतर्फ जाँदै गरेको ना २३ प २७४६ नम्बरको मोटरसाइकल डोरा खोलामा सोमबार दुर्घटना हुँदा पतरौता नगरपालिका–८ बस्ने २२ वर्षीय मोटरसाइकल चालक विजय यादव र सोही वडाका ५५ वर्षीय रामेश्वर यादवको समेत घटनास्थलमा मृत्यु भएको जानकारी दिए ।
मृतक ३ जनाकै शव जिल्ला अस्पताल कलैयामा राखिएको र परीक्षणपछि अफन्तजनलाई बुझाउने प्रहरीले जनाएको छ । यसअघि डोरा पुलमा २ जनाको मोटरसाइकल दुर्घटनामा मृत्यु भइसकेको छ ।
प्रकाशित मिति: मंगलबार, फागुन ६, २०७६
